لاعبات المنتخب المغربي: حنا محتاجين للجماهير المغربية وغنتقاتلو باش نربحو الماتش الجاي ونفرحوهم

عبرت لاعبات المنتخب المغربي على الاعتذار للجماهير المغربية بسبب الهزيمة أمام ألمانيا فالماتش الأول د مونديال السيدات 2023، بأستراليا ونيوزيلاندا، وفنفس الوقت أكدن أنهن مركزات على الماتش الجاي ضد كوريا الجنوبية باش يربحوه ويفرحو المغاربة.
وتحدثت لاعبات المنتخب المغربي فتصريح على هامش الحصة التدريبية د ليكيب ناسيونال اليوم الخميس، وقالت نسرين الشاد: "كنوجدو للماتش الجاي ضد كوريا الجنوبية بتركيز وبكل جدية وعارفين المسؤولية اللي علينا، وكنشكر الجماهير المغربية على الدعم ديالها وتشجيعها لنا فالماتش الأول وحنا محتاجين لهم وغنتقاتلو على قبلهم باش نربحو الماتش الجاي".
أسية زهير أكدت أن المنتخب المغربي مركز على تصحيح الأخطاء ديالو وتقوية نقاط القوة قبل ماتش كوريا الجنوبية، وقالت: "حنا كنوجدو باش نكونو على اتم الاستعداد للماتش الجاي، وعندنا دابا حصة تدريبية اللي من خلالها كنحاولو نوقفو على نقاط القوة والخلل والضعف ديالنا ونخدمو على الحوايج اللي عينفعونا فالماتش الجاي، وحنا مازال عندنا حظوظ وغندافعو عليها حتى لاخر لحظة".