الشرعي: حققنا لوبجيكتيف ديالنا بالتأهل لأولمبياد باريس ودابا غنتقاتلو فالفينال ضد مصر باش نربحو كوب دافريك

عبر الناخب الوطني عصام الشرعي مدرب المنتخب المغربي الاولمبي على الفرحة ديالو بتأهل ليكيب ناسيونال إلى أولمبياد باريس 2024، وشكر اللاعبين والجماهير المغربية على المساندة ديالها لهم فماتش دومي فينال كوب دافريك لأقل من 23 عام، وأكد أن المنتخب المغربي غيتقاتل باش يربح لاكوب فالفينال ضد مصر.
وتحدث عصام الشرعي فتصريح لموقع "كود"، بعد نهاية ماتش المنتخب المغربي الأولمبي ومنتخب مالي اللي ربحوه الأشبال بالبيلانتيات، بعدما سالا تعادل 2 لجوج بالشوطين الإضافيين وقال: "كنهنيو المغاربة كاملين على هذا التأهل المهم لأولمبياد باريس وكان هو لوبجيكتيف ديالنا وحققوه لولاد، الماتش ماكانش ساهل وهذا الشي كنا عارفينو".
وكمال عصام الشرعي وقال: "كنتمنى السبت الجاي ان الجمهور المغربي يكون حاضر معنا مرة أخرى فالفينال، باش يدفعونا ونحاولو نربحو هذا الماتش ضد مصر، وحنا المغاربة كاملين باغيين هذا لاكوب دافريك، والدراري يستاحقوها اللاعبين فبلادنا وماكرهناش نفرحو جميع المغاربة ورضات الوالدين معنا".
وختم عصام الشرعي وقال: "المنتخب المصري لعب قبل منا ولعبنا 120 دقيقة أي كثر منهم، ودابا غنبداو نريكيبيريو، وجميع اللاعبين غيكونو واجدين باش يلعبوا ماتش الفينال، دابا المهم نعوضو ونشوفو الدراري اللي عندهم إصابات ونعالجهم".