بوسة رئيس الاتحاد الاسباني للاعبة فالفينال ديال كاس العالم مرونة الصبليون. الحكومة دانت وشي كيطالب براسو

خالقة البوسة ديال رئيس الاتحاد الاسباني لكرة القدم لويس روبياليس للاعبة المنتخب الاسباني جيني إيرموسو بعد تتويج اسبانيا بكاس العالم للسيدات البارح الاحد، البلبلة فإسبانيا.
وباس رئيس الاتحاد الاسباني لكرة القدم اللاعبة إيرموسو فوق منصة التتويج، وقدام ملكة اسبانيا اللي كانت حاضرة فلحظة منح كاس العالم للمنتخب الاسباني لكرة القدم سيدات.
وخرجت اللاعبة جيني إيرموسو على موقع تويتر وعلقت على البوسة ديال رئيس الاتحاد الاسباني لكرة القدم، وقالت انها ما عجبهاش الحالي، ولكن ومن بعد حسب ما نقلت وكالة فرانس بريس عن الاتحاد الاسباني لكرة القدم، فاللاعبة اعتبرت ان البوسة جات عفوية بسبب الفرحة الكبيرة ديال التتويج بكاس العالم.
اللاعبة الاسبانية وحسب تصريحها لاذاعة "كوپي"، اكدت بلي عندها علاقة مزيانة مع رئيس الاتحاد الاسباني لكرة القدم، وبلي السلوك ديالو مع اللاعبات كاملين مزيان، وكاين اخترام بنهم وان المهم هو ربحو كاس العالم.
وزير الرياضة الصبليوني فهاد حكومة تصريف الاعمال اعتابر تصرف رئيس الاتحاد غير لائق ومدان.
والدة اللعابة سولاتها القناة الاولى "تي ڤي او" على هاد الشي وردات باللي هي باغية تهدر على الفوز بالمونديال ماشي على امور اخرى.
معلقون وصحافيون وسياسيون هاجمو روبياليس واعتابرو تصرفو "سيكسيست" وباللي شفر الاحتفال لكبير لهاد اللعابة وشي وحدين طالبو براسو