تطبيق "كريم" كيمارس الاحتيال فكازا. تعيط لطونوبيلة ومخلصها ب30 درهم يجيك طاكسي اللي ثمنو قل ب7 دراهم وهاد الشي فخبار صحاب التطبيق

اللي كيتحرك فكازا بتطبيق "كريم" كيحس براسو تقولب هاد ليام. باش كتطلب طونوبيلة كيعطيوك الاختيار فاش بغيتي تمشي: طونوبيلة "گاو سمارت" ولا طاكسي "گاو طاكسي" ولا "گاو ايكسطرا" اللي بغى يتهلى فراسو.
حسب شهادات للي كيستعملو هاد التطبيق فكازا فايلي طلب رحلة واختار "طونوبيلة" كيجيه طاكسي كيف قال احدهم ل"كود". هادا احتيال كبير من التطبيق ومن اللي كيستعملوه. علاش حقاش رحلة اللي كيديرها الطاكسي ب23 درهم مثلا٬ كيف وقع لهاد المستعمل فشهادتو ل"كود"٬ كيولي ثمنها ب29 درهم حتى 30 درهم فطونوبيلة. يعني الزبون كيتقولب ف7 دراهم.
هاد الشي كيدار بدعم من "التطبيق" حقاش كيشوفو كلشي.
حتى باش كيسولو الزبون اش واقع وباللي راه طالب طونوبيلة ماشي طاكسي كيبدا يدخل ويخرج فالهدرة وكيقول راه ما بدلش الطونوبيلة كيف شرح ل"كود" نفس المصدر. طبعا كذوب بتواطؤ هاد "كريم". راها اصلا كاينة حرب كبيرة بين الطاكسيات اللي دايرين بحال الفتوات وبين صحاب الطونوبيلات اللي خدامين مع "كريم"٬ ما يمكنش يكون طاكسي وعندو طونوبيلة خاصة بيه. ولا كانت راها فضيحة ما بعدها فضيحة