بالفيديو.. "كود" من قلب دوار تامقرا اللي دمرو الزلزال ضواحي شيشاوة: ها كيفاش عاشو السكان الرعب وماتو ليهم ولادهم وكولهم باغيين دبا فين يسكنو

يعتبر دوار تامقرا اللي كاين فالجماعة القروية "أسيف المال" شمال إقليم شيشاوة من بين الدواوير الأكثر تضررا من الزلزال اللي عرفو الإقليم، وماتو فيه عدد من الناس، بالإضافة إلى إصابة آخرين بجروح مختلفة.
شهادات حية حصلت عليها "كود" من الساكنة المتضررة واللي أكدات باللي عاشت الرعب والهلع جراء الزلزال اللي دمّر ليها الديور فين ساكنة، وكاين اللي ماتو ليه الدراري وكاين اللي ماتت ليه مراتو، وكاين اللي مات ليه راجلو.
سكان الدوار اللي وصلات ليه "كود" بالموطور حقاش جاي فالجبل كلهم أجمعوا على أنهم باغيين دبا فين يسكنوا. الناس مدمرة بزاف، وكاين اللي باغي دبا غير الخيم فين ينعس حقاش الزلزال دا كولشي ومخلاّ ليهم حتى شي حاجة.
خديجة لحريق إحدى المتضررات من الزلزال حكات ل"كود" كيفاش عاشت ديك اللحظة، وقالت: "مشينا نعسو انا وراجلي وولادي، سمعت صوت قوي. يسحاب لينا شي حجر ديال الجبل. شوية الدار بدات كطيح. الراجل طاحت عليه الضالة. بديت كنغوت. سمعوني ناس الدوار، جاو كيجريو".
وأضافت: "الناس عاونوني حتى جبدناه حي ولكن كولو مدگدگ. مجروح بزاف بزاف. يا سيدنا ما لقيناش فين نعسو ولا ما ناكلو، بغينا دار تسترنا راه الشتا جاية. عطاونا هاد لگياطن ولكن محتاجين السكنى تحمينا".
متضررة أخرى هضرات معاها "كود" من نفس الدوار وقدمات شهادة مؤثرة: "ما عقلت على والو. لقيت راسي برا. سولتهم علاش خرجتوني؟ ما كنت عارفة حتى باللي مضروبة فراسي. فهمت من بعد باللي هاد الشي شي حاجة كبيرة ماشي لحجر".
وزادت بنبرات لا تخلو من الحزن: "خرجوني من السرجم وهي الدار تريب كلها الدار كاملة كون طاح علي شي عمود كون مت. خرجوني من السرجم سمعت ولدي مصطفى كيغوت: الوالدة ماتت. داوني لبلاصة خاوية. أنا كنسول فيهم أش كاين؟ كنسمع لغوات ديال ناس الدوار".
وتابعت وهي تحكي لحظات الرعب اللي عاشتها: "من بعد عرفت باللي اولادي: مصطفى وغزلان وإلهام وحسن كلهم ماتو. فقدت ولدي مصطفى. تشويت فيه بزاف. دابا ما عندي حد. مشاو ولادي. كيضروني عيني ومضروبة فالراس وباغي فين نسكن. باغية نحيد من لگياطن".