واش خافو من عقوبة ثقيلة؟ برشيد خرجو يزاوكو فالرجاء والتحكيم. الخضرا: فريق شريف والمسؤولين ديالنا مع الحكم النحيح ما كانوش قاصدين لا الخضرا ولا الأجهزة

خرجو يوسفية برشيد يدافعو على العضوين بالمكتب المديري للنادي، اللي دازو عند لجنة الأخلاقيات فالجامعة الملكية المغربية لكرة القدم، بسبب شكاية دروها عليهم الرجاء الرياضي حيث بانو فواحد الفيديو وهماكيتهمو الحكم النحيح اللي لعب ماتش فريقهم ضد شباب المحمدية فالدور 3 من البطولة، بأنه عطى بيلانتي للرجاء فكأس العرش الموسم الماضي باش تأهلو، وقالو بأنهم ما كانوش قاصدين هذا الشي.
وناض المكتب المديري ليوسفية برشيد كيعترف بالفعل ديال مسؤوليه اللي دازو عند لجنة الأخلاقيات، وفنفس الوقت كيدافع عليهم وكيدعي أنهم ما كانوش قاصدين، وخرجو بلاغ غير دابا قالو فيه: "بناء على الأحداث اللي شهدتها مباراة فريقنا يوسفية برشيد أمام شباب المحمدية بين الشوطين، حيث انتشر مقطع فيديو، يتضمن احتجاج مسؤولين من الفريق على الحكم النحيح إذ تضمن بشكل عفوي وغير مقصود اسم الرجاء الرياضي".
يوسفية برشيد كملو وهما كيأكدو أن الرجاء نادي عندو تنافس شريف وأن التحكيم نزيه وهذا الشي عكس ما جا فالفيديو ديال المسؤولين الحريزيين بجوج، وقالو المكتب ديال الفريق الحريزي: "لا نشكك أبدا في التنافس الشريف لفريق الرجاء في البطولة الاحترافية وكأس العرش، كما أننا لا نشكك في نزاهة الأجهزة الساهرة على تسيير كرة القدم وتطويرها لما فيه مصلحة كرة القدم الوطنية".
ودازو المسؤولين ديال يوسفية برشيد بجوج عند لجنة الأخلاقيات بالجامعة الملكية المغربية لكرة القدم، بعدما وضع المكتب المديري للرجاء الرياضي شكاية عند اللجنة ضدهم بجوج، بعدما بانو فواحد الفيديو منشور فمواقع التواصل الاجتماعي وهما كيوجهو اتهامات للحكم النحيح بعد خسارة الفريق الحريزي مع شباب المحمدية، وكيقولو: "ساكنا نهار الماتش ديال الرجاء عطاهم بيلانتي.. كل عام كيسوكنا هذاك العام عطى للرجاء بيلانتي ما كاينش".
وكيرجع سلوك المسؤولين بجوج ديال يوسفية برشيد فماتش فريقهم ضد شباب المحمدية، للأدهان الواقعة ديال الرئيس السابق للنادي نور الدين البيضي، ملي بدا كيغوت فماتش الفريق ضد الجيش الملكي هذاك الوقت على اللاعب المنافس عبد الإله عميمي وكيقوله "ربحتيني بأربعة.. أنا عطيتك ماتش" فإشارة إلى أنه عطاه شي ماتش فاش كان كيلعب مع الكوكب المراكشي، وراه توقف البيضي بسبب هذه الواقعة لمدة 4 سنوات عن مزاولة أي نشاط ديال كرة القدم.