إعلام الكابرانات ضرباتو اللقوة بسبب خسارة الجزائر ورباح المغرب استضافة كاس إفريقيا و"بابابابا" سعر وحلم بالكاف عطى تنظيم نسخة 2027 للكابرانات

ضربها الإعلام الجزائري بصقلة، بعدما خسرو الكابرانات ديالو وخرجت الجزائر بشوهة من لاكورس الترشح لتنظيم كأس إفريقيا 2025، وهي البطولة اللي ربح المغرب الاستضافة ديالها عن جدارة واستحقاق اليوم الاربعاء، خلال تصويت أعضاء المكتب التنفيذي للاتحاد الأفريقي بالعاصمة المصرية القاهرة وبالأغلبية المطلقة.
وكاين واحد السكات ماشي عادي فالإعلام الجزائري اليوم الأربعاء، بحالا وسائل الإعلام الجزائرية ضربتها اللقوة، بسبب فشل العسكر الجزائري فاستضافة كوب دافريك، وقرر يحط السلاح قبل ما يوصل حتى موعد التصويت على شكون غينظم نسخة 2025 ونسخة 2027 من كأس أمم إفريقيا، حيث خافو يتشوهو مع الشعب الجزائري قدام قوة ملف الترشح المغرب.
الصحافة الجزائرية المسعورة، اختارت هاد المرة تخشي رأسها فالتراب بحال النعام ودير بحالا ما كاين والو، وما تنشر حتى خبر حول فوز المغرب بتنظيم كأس أفريقيا 2025، وكينيا وتنزانيا وأوغندا بتنظيم 2027، وخسارة الجزائر للترشح ديالها بعدما طاحت بالكاو خلال التصويت، خوفا من غضب تبون وشنقريحة، حيث المغرب ربح تنظيم كان 2025 بالإجماع ديال المصوتين بعدد 22 صوت مقابل زيرو صوت للجزائر المنسحبة، فالوقت اللي اختارت بنين ونيجريا وبشرف يمشيو يركزو على ترشحهم لتنظيم 2027، حيث عرفو حظوظهم منعدمة أمام المغرب، ماشي بحال الجزائر اللي كان الإعلام ديالها منذ أشهر وهو كينبح، قبل ما يطبق هو والكابرانات ديالو المثل اللي كيقول أن الكلب اللي كينبح ما كيعضش وهربو قبل ما تبدا المواجهة مع المغرب قدام الكاف.
وطبعا ووسط السكات ديال الاعلام الجزائري اللي جاتو سكتة قلبية، بسبب الخسارة الجديدة د العسكر التبوني الشنقريحي أمام المملكة المغربية، سعر "بابابابا" المجلي فقطر باش يدافع على الكابرانات ديالو، وحيث حتى هو ما تحملش صدمة الهزيمة الجديدة ديال أولياء النعمة ديالو، خرج فتدوينة جديدة على فيسبوك كيجدب وكيهاجم الاتحاد الإفريقي لكرة القدم، وبدا يدخل ويخرج فالكلام وكيقول أن لالجيري انسحبت لاعتبارات كيعلمها الجميع، وكيبان أن هاد الاعتبارات هي أن ملف الترشح المغربي قوي بزاف على الملف الجزائري، وهذا هو السبب اللي خلا "بابابابا" ما يقدرش يقول هذه الاعتبارات، خوفا من الكابرانات يمشيو يغضبو عليه ويمنعوه من الدخول للجزائر تاني كيفما داروها من قبل، فاش كان كيجي للمغرب عند صحابو من المغاربة اللي كانوا كيتهلاو فيه ويستقبلوه فديورهم ويوكلوه ويشربوه ويساريوه ولكن حيث هو ماشي ولد الأصل نكر الخير.
الغريب فالأمر هو أن "بابابابا"، مازال طامع فأن الجزائر غتنظم كأس إفريقيا 2027، ومؤمن بأن الاتحاد الأفريقي غيحيد استضافة هذه النسخة لكينيا وأوغندا وتنزانيا، وغيعطيها للكابرانات ينظموها حسب ما قال فالتدوينة ديالو، اللي باينة ديال شي واحد نعس مورا العصر وحلم بشي حاجة ماشي حتى لهيه.