الكاف باغي يشوه الكابرانات والجزاير ضربوها بصقلة بعدما خوا بهم العسكر وهرب بسبب قوة المغرب

واخا بغات الجزائر تنسحب من الترشح لتنظم كأس أفريقيا 2025 و2027، فالملف ديالها غيكون حتى هو حاضر غدا الأربعاء يوم التصويت والإعلان على شكون الفائز بتنظيم النسختين ديال المسابقة الأفريقية، واللي كيبقى المغرب أقوى مرشح لتنظيم نسخة 2025.
الاتحاد الإفريقي لكرة القدم رفض طلب الاتحاد الجزائري للعبة، بالانسحاب من تنظيم نسخة كأس افريقيا 2025 ونسخة 2027، وهو الطلب اللي رسلاتو الجزائر البارح إلى الكاف بعدما عرفو الكابرانات أن خسارتهم محتومة مرة أخرى أمام المغرب، وما منها هروب، وهاد المرة فلاكوس د الترشح لتنظم أهم حدث رياضي فإفريقيا.
ورفض الاتحاد الأفريقي لكرة القدم طلب انسحاب الجزائر بداعي أن الوقت فات على سحب الترشح، وطلب من الاتحاد الجزائري تحمل المسؤولية ودعا الرئيس ديالو وليد صادي باش يجي يحضر للاجتماع ديال المجلس التنفيذي د الاتحاد الأفريقي لكرة القدم غدا الاربعاء بالعاصمة المصرية القاهرة، اللي فيه غيكون التصويت والإعلان على الفائز بتنظيم كوب دافريك 2025، وهي النسخة اللي كل المؤشرات كتقول أن المغرب فطريقو باش ينظمها.
قرار الاتحاد الأفريقي برفض طلب الاتحاد الجزائري الانسحاب من تتظيم كاس إفريقيا 2025 و 2027، كيشكل إحراج كبير لكابرانات الجزائر ومن غيزيد يشوه صورتهم مع الشعب الجزائري وفالخارج، حيث العسكر الجزائري ملي اقتنع أنه خاسر لاكورس أمام المغرب، قرر ينسحب قبل الإعلان على النتائج وداير بأن الأولوية عند الاتحاد الجزائري هي ترتيب البيت الداخلي، فالوقت اللي التقدم لتنظيم تظاهرة رياضية كيكونو فيه مجموعة من المتداخلين والأجهزة وماشي غير الاتحاد المحلي د الكرة.
الكاف حط الكابرانات فموقف صعيب بزاف، وسالا لهم تخراج العينين، وحتى الإعلام ديالهم المسعور ضربها بصقلة هاد المرة وحاول ما أمكن يتجاهل الحديث على انسحاب بلادو ومناقشة الأسباب، حيث عرف أن الجزائر خسرت هذه المعركة الرياضية أمام المملكة المغربية حتى قبل ما يبدا التصويت على البلدان المرشحة لتنظيم كاس أفريقيا، وأن العسكر الجزائري حط سلاحو واستسلم من جديد فمعركة اخرى قدام المغرب، وقرر يهرب ومازال كاعما بدات.
من جهة أخرى، فكل المؤشرات كتقول أن المغرب غادي يربح تنظيم كاس افريقيا 2025، وهذا الشي ماشي حتى لدابا حيث الجزائر بغات تنسحب من الترشح، ولكن ملف الترشح المغربي هو قوي وقدر يقنع مسؤولي الكاف وأيضا بزاف ديال الاتحادات الوطنية فلافريك باش يصوتو له، حيث كيشوفو ومؤمنين أن المغرب هو الوحيد حاليا اللي قادر ينظم أحسن نسخة فكأس أفريقيا فتاريخ البطولة، بالنظر للإمكانيات اللي عند المملكة وقوتها فجميع المستويات، وهذا الشي اللي تسبب فهروب كابرانات الجزائر وخلاهم يقدمو طلب للكاف لسحب تنظيمهم قبل ما يتشوهو بنتائج التصويت.