حاربنا الفساد بكري.. زنيبر من سونتر دابيل ل"المتحكم" فتراخيص المصحات الخاصة والكونكورات بوزارة الصحة: ها تاريخ "قذافي الوزارة" لي بداه بفضيحة مالية فسبيطار زاكورة ودبا كيتحكم فكولشي

مقداتوش فيلة زادوه فيل، عنوان قصة واحد البروفيل غريب وعجيب من الموظفين "المشبوهين" بوزارة الصحة، وكيتعلق الأمر بعادل زنيبر باش للي هو المسؤول الأول عن الموارد البشرية بوزارة الصحة، اييه هادي غير أسابيع قليلة زادوه منصب اخر بالنيابة لي هو مدير مديرية التنظيم المنازعات.
زنيبر قصة عجيبة لموظف بسيط ف"سونتر دابيل" ثم تحول بين عشية وضحاها إلى موظف فسبيطار صغير بمدينة زاكورة، وتدار ليه مجلس تأديبي بسبب خروقات مالية وهو عارف هادشي مزيان.
ايه من واحد عليه تقرير ومجلس تأديبي إلى مسؤول على المنازعات القانونية ويتدخل للمصحات ويفك هذا ويتدخل لهذا وهو المسؤول على الكونكورات بالوزارة.
زنيبر فاش شد منصب مدير مديرية الموارد البشرية هاد سنوات، كان فقط اطار اداري متصرف حاصل على ماستر ووكيوجد لدكتوراه في قانون الصحة بجامعة محمد الخامس بالرباط.
تولى زنيبلا منصب مدير الموارد البشرية DRH بصفة رسمية سنة 2020، كان هو المدير بالنيابة منذ اكتوبر 2019 (فاش جاء ايت الطالب)، خلفا لرشيد الصديق من التقدم والاشتراكية، مور اعفاء أنس الدكالي من من وزارة الصحة على خلفية التعديل الحكومي.
زنيبر كان خدم فالقطاع الخاص مع وكالات تأمين و سونتر دابيل، اييه من سونتر دابيل إلى متحكم فتراخيص المصحات الخاصة وتراخيص لمصحات متخصصة في الأشعة (يعني داكشي ديال الملايير) وبلا ما نهضرو على الكونكورات، يلا بغيتي طلع كراد خصك ماهي وما لونها.
الوزارة كاملة تخلت على أطرها وكبار الدكاترة والمتخصصين والنبهاء وجابت واحد عليه مجلس تأديبي. هذا غير فسبيطار صغيرة وكحلها خلي وزارة قداش والمصالح لي فيه.
باش تعرفو مزيان كيفاش زنيبر "تغول"، القصة بدات فاش توظف فعهد ياسمينة بادو الاستقلالية سنة 2010، وتعين فزاكورة، دوز فيها عام ومن بعد انتقل لفاس بعد مدة قصيرة الى الرباط.. غير هادي تعطيكم صورة على هاد زنيبر أو "قذافي" وزارة الصحة، مكرهش يبقا فالمنصب حتى يموت، واحد طلع بالتوظيفات العجيبة ديال حزب الاستقلال وأصبح الآمر والناهي بالوزارة، ولكن طبعا كيعرف يدير صفقات مع المسؤولين بالوزارة كيدير ليهم خاطرهم مقابل يبقى فالمنصب.
دازت غير عامين، من 2010 سنة التوظيف فسبيطار صغير، ل2012 السيهم زنيبر حط رجليه فمديرية المديريات ,, ومن هنا غادي يبدا التطور الكبير .. اييه التطور لي علا بالكم.
من رئيس مصلحة، الى رئيس قسم الى مدير مديرية الموارد البشرية بالنيابة الى التعيين الرسمي DRH وهادشي فأقل من 6 سنوات، كيفاش دار ليها. أسرع تسلق وظيفي فتاريخ المغرب يمكن.
فاش جا زنيبر لهاد المديرية ديال الموارد البشرية، الأطر الصحية كتهضر على تأخر معالجة ملفات الموظفين، تواصل منعدم مع ممثلي الاطر الصحية والنقابات، وشبهات فالكونكوورات وو غير هادي مكانش عليها ضجيج بحال وزارة العدل.