الشيخ طحنون مفراسوش؟..نايض صداع فأوطيل كونراد بين فورنيسورات ديال الشراب والماكلة والفرماج مع مسؤولين فهاد لوطيل..ها جواب الإدارة

واش بصخ نايض صداع فأوطيل "كونراد" اللي فالهرهورة، وبلي فعلا كاينا مشاكل كبيرة بين الإدارة المالية ديال اوطيل وعدد من الشركات لي كتجيب ليهم السلعة. الإدارة كتقول لا، ومصادر من الموزعين كيقولو اه كاينا مشاكل وتعطال فالخلاص وكاين لي مبقاش كيتعامل معهم.
اوطيل ديال واحد من شيوخ الإمارات الأقوياء، الشيخ طحنون بن زايد، طبعا كيجي للمغرب وفاش كيجي يشوف اوطيل ديالو كيتهلا فالمستخدمين.
هاد لوطيل تشهر بزاف فاش كان استقبل فريق ريال مدريد خلال تنظيم المغرب للموندياليتو. لكن حسب مصادر من داخل لوطيل :" دبا لوطيل عامر مشاكل عندها علاقة بالتدبير المالي مع الموزعين".
وأكد ذات المصدر بلي عدد من الموزعين خصوصا الشراب والفرماج والماء والمشروبات الغازية، كيتشكاو من طريقة تعامل الإدارة معهم، وهادشي لي خلا البعض منهم يحبس التوزيع معهم بحال شركة مشهورة اللي كتوزع الشراب.
مسؤول فشركة "براسري" الموزعة للشراب رفض يهضر مع "كود" بخصوص المشاكل للي واقعا ليه مع ادارة الفندق، لكن مصدر داخل الشركة أكد وجود مشكل بين الشركة ولوطيل.
مسؤولة داخل لوطيل قالت ل"كود" :"هادشي كامل كذوب، ولوطيل كيلتزم مع كاع الشركات للي كيتعامل معه بصرامة وبجدية وكيخلصهم فالوقت"، مضيفة :"عندنا قواعد كنحترموها واللي ملتزمش بها كنوقف معه الخدمة".
وشددت المسؤول في اتصال مع "كود" :"مكاينش تعطال أبدا فالخلاص ديال لي فورنيسور"
هاد الصداع لي نايض، كاين لي كيوجه اصابع الاتهام إلى المسؤولة الأولى على التدبير المالي للفندق، ومراقب المشتريات داخل الفندق، وكاين لي كيقول بلي غير صراع بين المسؤولين داخل الفندق كولشي باغي يشد بلاصتهم.