توقعات مونديال 2030. الافتتاح غيكون الاورغواي والنهاية تقدر تكون فمدريد ونصف النهاية عندنا وعند البرتقيز. امريكا اللاتينية عندها غير 3 ماتشات و99 ماتش غتفرق على المغرب والبرتغال والصبليون

لخبار الزوينة ديال مونديال 2030 باللي غادية تكون فالمغرب مع اسبانيا والبرتغال واللي علنها اولا الديوان الملكي فبيان رسمي عاد تبعاتو الفيفا٬ غادية تكون مختالفة. الاحتفال بمئوية المونديال خلات الاتحاد الدولي يبدل كلشي. هاد المونديال بحال مونديال امريكا المكسيك مع كندا ف2026 غادية تشارك فيه 48 دولة وعدد الماتشات يتوقع يوصل ل104 ماتش.
امريكا الجنوبية غادي يكون عندها من هاد 104 ماتش غير 3 اي 99 ماتش غادية توزع بين المغرب والبرتغال واسبانيا. ماتش الافتتاح غادي يكون فالملعب الشهير "اسطاديو سينتيناريو" بالعاصمة مونتيفيديو بالاورغواي. غادية تلعب هاد الدولة مع اللي غادي يخرج ليها فالقرعة. تم اختيار هاد الماتش للاحتفال بمئوية المونديال. 1930 تنظم اول مونديال بهاد الدولة.
من بعد غادي يكونو جوج ماتشات ببوينوس ايرس وغادية تلعب فيه الارجنتين والثالث غادي يكون فالباراغواي بالعاصمة اسونسيون. يعني ثلاثة الماتشات فقط لا غير
من بعد غادي يقسمو ماتشات المجموعات على المغرب والبرتغال واسبانيا. طبعا الصبليون عندهم البنية التحتية الاقوى فهاد الدول. من المتوقع يكون فيها اكثر الماتشات ومن المتوقع تحتاضن النهاية بمدريد بملعب سانتياگو بيرنابيو.
فيما المغرب والبرتغال من الاضافة الى ماتشات المجموعات وماتشات من الدور الثاني٬ يتوقع يكون فيها ماتشات نصف النهاية