واش صافي أوفيسيال خدا المغرب واسبانيا مع البرتغال تنظيم مونديال 2030؟ لا مازال حيث خاص يتصادق عليه من كونكريس الفيفا وها امتى وحتى الاوروغواي والأرجنتين والباراغواي يقدرو ما ياخدو حتى ماتش

وضح الاتحاد الدولي لكرة القدم، فتقرير له كيفاش تم قبول ترشح ملف المغرب وإسبانيا والبرتغال لتنظيم مونديال 2030، ومعهم حتى الاوروغواي والأرجنتين والباراغواي اللي غينظمو 3 الماتشات (ماتش لكل واحد فيهم) من هذا المونديال بمناسبة مرور 100 عام على أول كاس عالم اللي كانت عام 1930 فالاوروغواي، وحسب الفيفا راه واخا الكونكريس ديالو صادق وبالاجماع على ملف الثلاثي المذكور باش يكون هو ملف الترشح المشترك لتنظيم نسخة 2030، راه مازال خاص الملف يدوز فمؤتمر الفيفا ويم التأكيد عليه فهذا المؤتمر.
ووضح الاتحاد الدولي لكرة القدم فتقرير له وقال: "صادق مجلس FIFA بالإجماع على أن يكون الملف المشترك بين المغرب والبرتغال وإسبانيا هو ملف الترشُّح الوحيد لاستضافة كأس العالم TM️FIFA 2030، على أن تتأهل منتخبات هذه الدول الثلاث تلقائياً إلى تلك النسخة من البطولة، وذلك عبر المقاعد المخصَّصة للاتحادين القاريين المعنيين شريطة نجاح هذا الملف في عملية التقييم وتأكيد مؤتمر FIFA لهذا القرار خلال اجتماعه المقرَّر في 2024".
الاتحاد الدولي لكرة القدم، وفالتقرير ديالو دائما كيأكد أن ملف المغرب وإسبانيا والبرتغالي تمت المصادقة عليه من طرف مجلس الفيفا باش يكون هو ملف الترشح الوحيد المشترك لاستضافة مونديال 2030، وأن الدول بثلاثة غتكون هي المضيفة بشرط وكشف عليه وقال: "شريطة نجاح هذا الملف الثلاثي في عملية تقديم ملفات الترشُّح المشار إليها أعلاه وتأكيد كونغرس FIFA لهذا القرار".
وبخصوص امتى يتم تأكيد قرار منح استضافة بطولة كأس العالم 2030، بشكل رسمي للدول المترشحة (المغرب واسبانيا والبرتغال)، أكد الاتحاد الدولي فالتقرير ديالو أنه المتوقع يتخذ كونكريس الفيفا اللي كيتكون من 211 عضو (اتحاد وطني) القرار ديالو النهائي والرسمي في الرابع الرابع من عام 2024.
وطبعا وحسب الفيفا فحتى إقامة 3 الماتشات من مونديال 2030 فأمريكا الجنوبية، موزعة على الاوروغواي والأرجنتين والباراغواي، فتمت المصادقة عليه كمقترح داخل ملف ترشح المغرب وإسبانيا والبرتغال لتنظيم المسابقة اللي فيها 101 ماتش، ومازال خاص هذا المقترح يخضع لشرط اجتياز عملية تقديم ملفات الترشُّح وتأكيد كونغرس FIFA عليه.