واش قاد يغامر ويلعب مع المغرب فكأس إفريقيا؟ ابراهيم دياز واحل بين كوب دافريك وريال مدريد

من المنتظر تكون الشهرين الجايا حاسمة فحمل إبراهيم دياز نجم ريال مدريد الإسباني لتوني المنتخب الوطني المغربي، بعدما قرر النجم الصاعد يلعب للمغرب ولكن المشكل كاين مع الفريق ديالو الريال.
مصادر "كود" كشفت أن إبراهيم دياز مقتنع حاليا باللعب للمغرب وما بقاتش عندو فكرة أنه يلعب لإسبانيا، وأن الناخب الوطني وليد الركراكي وبروجي الجامعة الملكية المغربية حسم فالاختيار ديالو للمنتخب المغربي، ولكن المشكل كاين دابا فموعد اللي غيجي يلعب فيه مع الأسود واللي ولا ديما كيتأجل.
ووضحت نفس المصادر، أن إبراهيم دياز باغي يجي يلعب مع المنتخب المغربي، والناخب الوطني وليد الركراكي والجامعة باغينو يكون مع ليكيب ناسيونال فكأس أفريقيا فالكوت ديفوار شهر يناير 2024، ولكن هذا الشي رافضو ريال مدريد الإسباني، حيث هذا الوقت من الموسم بالنسبة للفريق الإسباني مهم فالموسم ومحتاج فيه لجميع اللاعبين ديالو.
إبراهيم دياز فموقف صعيب، حيث مازال ما دار بلاصتو فريال مدريد اللي ضاغطين عليه، والغياب أصلا على الفريق الإسباني لمدة شهر كيهدد بلاصة اللاعب واخا يكون تيتيلور، بقى غير لاعب اللي مازال كيقلب على بلاصتو وسط أحسن ايكيب فالعالم، والقرار كيبقى للاعب طبعا حيث الجامعة والناخب الوطني كيحترمو رغبة اللاعب اللي ما يقدرش ريال مدريد يمنعو إذا قرر يجي يلعب مع المنتخب المغربي فكاس أفريقيا فالكوت ديفوار.