كيفاش ورط بوريطة المغرب فادانة حليفها الجديد فمجزرة صبيطار غزة. علاش اتهمات "القوات الاسرائيلية" بالزربة واش غادية دير دابا مع اعلان بايدن ان القصف دارتو "جماعة ارهابية" فلسطينية

واش ناصر بوريطة وزير الخارجية والتعاون ورط المغرب فبيانو اللي جا ساعات بعد قصف تعرض ليه صبيطار غزة قبل يومين ومات فهاد المجزرة اكثر من 500 شخص؟ اولا وزير الخارجية فالبيان اللي دارو باسم المملكة المغربية كان واضح وحاسم وكتب: "تدين المملكة المغربية بشدة قصف القوات الإسرائيلية مستشفى المعمداني في قطاع غزة وما خلفه من ضحايا بالمئات من بين الجرحى والمصابين".
اي ان وزارة بوريطة متأكدة الف فالمائة باللي اللي قصف هي "القوات الاسرائيلية". جا بيان الخارجية المغربية دقائق من بيان الخارجية السعودية اللي فيه اتهام مماثل لاسرائيل. غير هي السعودية ما عندها حتى شي علاقة مع اسرائيل. بلادنا شرات السلاح منها وتجهزات باسلحة اسرائيلية ودخلات معاها فاتفاقيات كتهم الفلاحة والتكنلوجيا الحديثة والتعليم والصحة....
الرئيس الامريكي جو بايدن اكد هاد الصباح للصحافيين ان لديه ادلة دامغة مصدرها وزارة الدفاع الامريكية "البنتاگون" على الجهة اللي دارت مجزرة مستشفى المعمداني فعزة ول البارح واللي مات فيها 500 شخص. بايدن قال "بناء على المعلومات اللي عندنا حتى الآن، كيبان ان الضربة من صاروخ غير مسارو وهاد الصاروخ طلقاتو جماعة ارهابية فغزة".
البارح كان اكد بايدن رواية رئيس الوزراء الاسرائيلي نتنياهو اللي قال باللي الصاروخ اللي ضرب الصبيطار غزة جا من عند "الجهاد الاسلامي" وباللي بغاوه يرسلوه لاسرائيل ولكن ضرب الصبيطار. من بعد خرجات اسرائيل تسجيلات صوتية دقادة حماس كتقول باللي الصاروخ اللي دمر الصبيطار ديال "الجهاد الإسلامي" وباللي تطلق من مقبرة ورا الصبيطار.
"حماس" ومعاها "الجهاد الاسلامي" كذبو الرواية الاسرائيلية الامريكية
دابا القضية محتاجة لتحقيق دولي مستقل باش نعرفو شكون طلق الصاروخ ولكن قبل هاد الشي بوريطة حكم واتاهم اسرائيل. ديك العبارة اللي جات بعد الاتهام وفيها "تجدد المملكة المغربية مطالبتها بحماية المدنيين من قبل كل الأطراف وعدم استهدافهم" و"تؤكد المملكة المغربية التي يرأس عاهلها صاحب الجلالة الملك محمد السادس، نصره الله، لجنة القدس الشريف، على الحاجة الملحة لتظافر جهود المجتمع الدولي لإيقاف الأعمال العدائية بأسرع وقت واحترام القانون الدولي الإنساني والعمل على تفادي انزلاق المنطقة نحو مزيد من التصعيد والاحتقان". ما كيبقاش عندها معنى كثير.
بوريطة كيف عادتو كيزرب فميدان ديال الرزانة والتريث.