ها كيفاش المباحثات بين بوريطة ووزير خارجية امريكا هدرات على الاستمرار اعتراف واشنطن بمغربية الصحرا بلا

وزير خارجية امريكا فاتصالو بناصر بوريطة اليوم الجمعة 30 ابريل 2021 هدرو على الصحرا بذكاء. بيان الخارجية المغربية ما قال والو بشكل مباشر ولكن كاينة فقرة كتقول باللي كلشي غادي يبقى كيف كان وباللي اعتراف امريكا بمغربية الصحرا ما غادياش تتغير. هاد الفقرة هي باش هدرو على "الاتفاق الثلاثي" الموقع بين الولايات المتحدة الامريكية واسرائيل والمغرب ف22 دجنبر 2020. هنا جا فالبيان باللي بلينك "حيى عودة الاتصالات الرسمية بين المغرب واسرائيل" وسجل ان "هاد العلاقات غادية تجيب مكاسب على المدى البعيد" وهدر على الدور لللي كيلعبو المغرب فالسلام فالشرق الاوسط.
الاتفاق الثلاثي المغربي الاسرائيلي الامريكي فيه جوج امور. عودة العلاقات المغربية الاسرائيلية واعتراف امريكا بمغربية الصحرا. هادا ما يمكنش يكون بلا هادا. ثم باش ما هدروش على الصحرا راه فحد ذاتو تأكيد على ان الادارة الجديدة فواشنطن ما غادياش تغير موقفها. واخا تبدلات اللهجة ولكن الاعتراف مازال قائم
بيان الخارجية المغربية قال باللي ناصر بوريطة وزير الخارجية والتعاون تلفن لبلينكلن سكرتير الدولة الامريكي في الخارجية٬ شكرو بعضياتهم على الشراكة الاستراتيجية القوية والدائمة اللي كيتجمع من سنوات الدولتين.
هاد الشي جا بعد اتصال كان دارو هاد المسؤول الاميركي البارح مع وزير الخارجية الجزائري.
كما هدرو على دور العلاقات الشخصية بين محمد السادس وجو بايدن فالرقي بهاد الشراكة
وزير الخارجية الامريكي٬ وفق بيان الخارجية٬ اشاد بالتقدم المسجل في المغرب هادي عشرين عام الاخيرة باشراف من الملك٬ خاصة الاصلاحات السياسية والتقدم الاقتصادي والتنمية الاجتماعية.كما اثنى على ريادة الملك فمحاربة التغيرات المناخية والاستثمار فالطاقات البديلة وتشجيع الاقتصاد الاخضر.
وهدرو على ليبيا والساحل ودور المغرب في المنطقة كقوة استقرار فمنطقة ما فيها استقرار.
وزير خارجية امريكا دار تدوينة قال فيها باللي المباحثات بينو وبين بوريطة كانت "مزيانة" وهدرو على العلاقات الثنائية وعلى قضايا تهم المنطقة =المغاربية والساحل= وباللي كانت مناسبة يقول للمغاربة "رمضان كريم".