عادل رمزي: عندي كروب منضبط ولاعبين محترفين واجدين باش يربحو الترجي وها شكون غيربح السوبر ليك

أكد عادل رمزي مدرب الوداد الرياضي ان استعدادات الفريق لدومي فينال السوبر ليك الإفريقي ضد الترجي التونسي كتدوز مزيان، وان اللي غيربح لاكوب هو اللي غيكون واجد بدينا.
وتحدث عادل رمزي قبل ماتش الوداد الرياضي والترجي التونسي وقال: "الاستعدادات ديالنا كندوز فظروف مزيانة، اول حاجة الطرقة باش دازو 2 ماتشات الماضيين كتعطينا الثقة كبيرة فالإمكانيات ديالنا ومشكورين على العرض اللي قدموه".
وزاد وضح عادل رمزي بالنسبة للفريق المرشح يربح لاكوب، وقال: "المسألة البدينة، ليماتش راه متابعين واللي غيربح هذا الكاس هو اللي بدنيا غتكون عندو لافريشور فيزيك، ومنضبط تكتيكيا وكنحاولو حنا نستغلو الوقت ونديرو تداريب زايدة باش نحيدو العياء".
وعبر رمزي على الافتخار ديالو بالكروب الودادي الحالي اللي عندو، وبالخدمة اللي داير سعيد الناصيري رئيس النادي باش يوفر لهم جميع الظروف للمنافسة على الالقاب.
وقال: "كنفتخر أنا كمدرب بالكروب ديالي حيث منضبط حيث بزاف كندويو هنا فالمغرب بلي ما كايناش لاديسبلين، ولكن لا لا راه كاينة لاديسيبلين وانا بعدا شفتها وباش نقارنها فهولندا فين كنت وهنا راه بحال بحال وداكشي اللي كنقول كيدار وفوسط هادشي كاين جو عائلي".
وكمل عادل رمزي وقال: "الرئيس سعيد الناصيري ما مقصرش معنا واللاعبين مستعدين، الاجواء مزيانة وكنحس بطاقة زوينة سوا وسط الكروب او فالمحيط ديال الفريق من عند الوداديين.. أنا كنأمن بالفال المزيان والفال راه موجود".