من الخطأ يكون الحوار مع النقابات لي مبقاتش عندها مصداقية..هي لي ورطات الدولة فهاد الأزمة باش رفضو زيادة 2500 درهم فالأول للأساتذة وفضلو مصالح "الموظفين القدام" والتنسيقيات هي لي حاكما "لازون" ديال الاحتجاجات

الحوار لي غادير الحكومة مع النقابات الأكثر تمثيلية يوم الاثنين المقبل، بحال يلا كاتكب الما فالرملة، خصوصا وأن الحوار مع "نقابات" كانت سبب رئيسي فهاد العافيا لي شعلات وسط التعليم اييه. هاد النقابات راهم رفضو زيادة 2500 درهم فالحوار الاجتماعي بداية الولاية الحكومية.
النقابات لي مبقاوش كينخرطو معهم الأساتذة وموظفي قطاع التعليم الجدد، هاد الموظفين كيفضلو التنسيقيات حيث عارفين النقابات "دايرين يد" مع الحكومات وكولشي شاف كيفاش نقابيين تحولو ل"سماسرة" وراهم فمجلس المستشارين وفمجلس النواب وفمؤسسات عمومية، دايرين خبلة فهادشي. شوفو كاع قيادات النقابات كلهم عندهم امتيازات وبريمات فمؤسسات استشارية او عمومية بحال المجلس الاعلى للتعليم أو مؤسسات اخرى أو مجالس دستورية.
الخطأ لي دارت الحكومة اليوم هي انها اختارت الجانب الضعيف فالاحتجاجات الأخيرة، اللي هي النقابات "معندهاش طبعا مصداقية" وسط الأساتذة، شوفو غير الفرق بين احتجاجات النقابات واحتجاجات التنسيقيات.
فاش وزير العدل عبد اللطيف وهبي، دعا رئيس الحكومة عزيز اخنوش، وسط اجتماع الاغلبية وبحضور الصحافة، باش يتحاور مع الجميع وميقبلش لي الذراع، راه قصد يتحاور مع التنسيقيات لي طبعا فيها العدل والاحسان واليسار الراديكالي هادو كيتزعمو مثلا اساتذة التعاقد.
الحوار مع النقابات هو تأجيج الأزمة واستمراراها، راه ميمكنش يعولو على نقابة ديال الاستقلال ولا ديال مخاريق . كيكبو الما فالرملة وصافي.
يشار بلي عزيز أخنوش، رئيس الحكومة قد كشف بأن الرفع التدريجي من الحد الأدنى للأجور الصافية في قطاع التعليم إلى 7000 درهم، كاين فالبرنامج الحكومي اللي فيه فقرة كتقول "تطوير مهنة التدريس تمر عبر تحسين دخل الاستاذ عند بداية المسار ومواكبته وتقييم منتظم لكفائته وفي إطار الحوار".
وأفاد أخنوش، خلال لقاء الأغلبية اللي كان فالأيام الماضية، أنه منذ "افتتاح الحوار الاجتماعي فالأسبوع هاد 2500 درهم غاتعطيوها للجداد ولكن النقابات مبغاوهاش فالدخلة وبغاوها فالخرجة "...
وبخصوص احتجاج الأساتذة قال أخنوش :"انا عاطي الضمانة ديالي وغاتكون اللجنة وغايكون فيه وزير التعليم وفجانبه الوزير السكوري وفوزي لقجع وزير الميزانية باش نشوفو الاشكالية ونتحاورو معكم، وانا مستعد نترأس الاجتماع الأول ونتبع باش نشوفو الحلول لي تخلي وليداتنا يقراو وتكون الجودة".
وطالب أخنوش الأساتذة بالعودة إلى حجرات الدراسة، وخاطبهم بلي غايسمع ليهم ويتشاور معها ويمشي معه فالنقط لي كيطالبو بها.