"اخنوش ارحل" و"حكومة ماشي سياسية ولا منساجمة". الوزيرة المنصوري ل"كود" ردات على كلشي: هادي حكومة منسجمة. كتخدم ليل ونهار باش تقدم حلول لمشاكل المغربي ومحملة مسؤوليتها كاملة

فاطمة الزهراء المنصوري، وزيرة إعداد التراب الوطني و التعمير و الاسكان وسياسة المدينة ما عندهاش مع لكلام الخاوي. كتخدم بزاف. فالوزارة وفمجلس المدينة دمراكش اللي كترأسو بالاضافة الى عملها الحزبي كرئيسة للمجلس الوطني لحزب الاصالة والمعاصرة. هاد الشي اللي وقع وكيوقع٬ بخصوص الانتقادات الموجهة لحكومة يرأسها عزيز اخنوش ويشارك حزبها البام فيها مع حزب الاستقلال٬ ما عاجبهاش. بالنسبة ليها كدافع على حرية التعبير وحرية الاحتجاج لانو كيخليك تسمع نبض المجتمع ولكن كدافع على هاد الحكومة ايضا.
المنصوري اكدات ل"كود" باللي هاد "الحكومة تحملات مسؤوليتها" وخدامة ليلة ونهار وباللي بعد 4 اشهر كتعيش انسجام وما عندها حتى شي ازمة داخلية.
بخصوص "صمت الحكومة" قالت المنصوري ل"كود" باللي هاد الحكومة كتكلم وكتواصل مع المغاربة. كل اسبوع كيكون مجلس حكومي كيخرج الناطق الرسمي مع وزير وكيشرحو للمغاربة الوضعية. بحال كيف دار فوزي لقجع فاخر مجلس حكومي باش هدر الوزير المنتدب لدى وزيرة المالية المكلف بالميزانية٬ علي ما يقال غلاء الاسعار وارتفاع اثمنة البترول وانعكاسو على الاقتصاد الوطني٬ كما كيجي رئيس الحكومة للبرلمان بمجلسيه وكيجيو الوزراء للبرلمان وكيتواصلو مع المجتمع بالاضافة الى نقطة اخرى توضحها المنصوري وتتعلق بفتح الحوار الاجتماعي٬ فكل وزير فهاد الحكومة فتح الحوار الاجتماعي مع النقابات مع اللي عندهم الشرعية للتحاور
بخصوص واش هاد الحكومة سياسية وواش كاين كتسمع لنبض المجتمع قالت المنصوري ل"كود" بللي هادي حكومة سياسية وصلات بصناديق الاقتراع وممثليها: التجمع الوطني للاحرار والاصالة والمعاصرة والاستقلال٬ صوتو عليهم لمغاربة ووزراء امثال اخنوش ووهبي والبركة اللي هما امناء عامين هاد الاحزاب٬ على اتصال دائم مع المواطنين وعارفين كاع المشاكل حقاش كيسيرو مدن او نجحو فدوائر.
رئيسة المجلس الوطني للبام قالت ل"كود" باللي هي مثلا عندها اتصال دائم بالمدينة اللي كترأس مجلسها البلدي. كتعرف كاع مشاكل الساكنة من خلال الانصات الدائم والزيارات كل نهاية اسبوع وتتبع كاع المشاريع
على هاد الشي فالوزيرة كتشوف باللي الشعار ديال "اخنوش ارحل" راه ما عندو معنى. اولا راه كيعني الحكومة اللي يالله 4 اشهر باش بدات خدمتها٬ ترحل. حكومة جات بصناديق الاقتراع٬ وكيف قلت جميع وزراءها فاتحين الحوار وكيتصنتو لجميع المطالب وخدامين كيجيبو حلول للتعليم والتربية وللصحة من خلال التغطية الصحية والتغطية الاجتماعية وللشغل من خلال ميثاق الاستثمار وللشباب من خلال تحقيق مطالب شباب هاد البلد. تجاوبو بسرعة مع الازمة اللي عرفتها قطاع السياحة. الوزيرة كتردد ان "الدولة الاجتماعية" هو اساس خدمة هاد الحكومة
المنصوري كتقول فحوارها مع "كود" باللي واخا الحكومة ما عندهاش عصا سحرية لحل كاع مشاكل المغرب باللي كاينة وضعية دولية خلات اثمنة البترول والمواد الاولوية يغلاو وباللي الجفاف حتى هو زاد كمل مع تبعات كورونا وطنيا٬ واخا كلشي هاد الشي تمكنات الحكومة باش تخلي لبلاد غادية وما عندهاش خصاص كيف كيوقع فشي دول