فضايح "سيتي باص" ففاس. معاناة كبيرة تنقلها "كود" من مستعملي الطوبيسات واطلاق حملة "بغينا حافلات مزيانة" للضغط على المسؤولين

خرجات "كود" لشوارع فاس اليوم الجمعة ومشات بالضبط لعدد من محطات الطوبيسات اللي ناضت عليهم لهضرة مؤخرا بزاف، وتعالت الأصوات باش يجيو حافلات جداد كيليقو بسكان العاصمة العلمية وسمعات "كود" لعدد من الطلبة وعدد الناس اللي يوميا طالعين هابطين فالطوبيس.
ناس فاس مراضياش:
أغلب الناس اللي طالعة فالطوبيس ففاس كاعية ومراضياش على الخدمات اللي كتقدمها الشركة المفوض لها تدبير النقل الحضري "سيتي باص"، وكاين البعض كاين كيشوف من جيهتو أن تطاحنات سياسية مورا هادشي، لكن الوضع خاصو معالجة بالزربة.
"كود" طلعات فالخط لي كيمشيو فيه الطلبة وكيفيقو فيه على الصباح باش يمشيو لجامعة ظهر المهراز، وهضرنا مع واحد الطالبة اللي عبرات على السخط ديالها من الوضع ديال النقل الحضري اللي وصل للأسوء، خاصة الحالة الميكانيكية التي تعرفها بعض الحافلات.
طالب آخر داير الحقوق فحديث مع "كود" قال باللي الطلبة دارو نداءات كثيرة على مواقع التواصل الاجتماعي وكانوا وقفات احتجاجية على هاد الوضع، وباللي كانت حتى الدراسة وقفات بسبب تدبير النقل الحضري بالإضافة إلى مطالب أخرى كانت محط احتجاجات طلابية.
رواد مواقع التواصل الاجتماعي وحملة بغينا طوبيسات جداد:
هادي مدة طويلة كان عدد من النشطاء على مواقع التواصل الاجتماعي طلقو حملة تحت عنوان "بغينا طوبيسات ففاس"، ونددت هاد الحملة بالوضعية اللي وصلات ليها الحافلات ديال النقل الحضري، وبغات التغيير ديالها.
هاد الحملة اللي كان موراها عدد من الطلبة الغاضبين على وضع النقل الحضري عرفات إقبال كبير وشاركوا فيها عدد كبير وغير مسبوق من نشطاء العالم الأزرق، وكان المطلب الوحيد هو تحسين جودة عمل الحافلات ديال النقل العمومي.
نداءات ناس فاس جات مني وصلات الحالة الميكانيكية خاصة ديال الطوبيسات لوضع خايب بزاف، وماشي غير هادشي تهالكت أغلب الحافلات حقاش هادي سنوات طويلة وهي خدامة وكيتم إدخال بعض الإصلاحات الترقيعية وصافي، وهادشي مع الوقت كبر ووصل حتى للداخلية اللي بغات مسطرة التحكيم ووصلوا فيها لبعض النتائج بين جماعة فاس والشركة المفوض لها.
العقد اللي سينا شباط خرج على النقل الحضري:
قامت شركة "سيتي باص" بعد ضغط كبيرة من الداخلية بإدخال عشرات الحافلات الجديدة إلى فاس والعمل بها حاليا، والهدف منها هو التحسين ديال جودة النقل الحضرية فالمدينة اللي الساكنة ديالها اللي مزال غاضبة على هاد الوضع.
مصادر متابعة الشأن المحلي وضحات باللي هاد الأزمة معقدة بزاف حقاش كان الرئيس السابق للمجلس حميد شباط دار عقد مخربق مع الشركة وطويل الأمد،وهذا موضوع آخر، قبل أن تؤكد أن الشركة شرات طوبيسات جداد والتزمت باحترام كناش التحملات لكن مزال الجماعة كتساين تجويد عدد من الخدمات.
شباط مني كان رئيس الجماعة دار عقد مع الشركة فيه 15 لعام. إييه 15 لعام يا سيدي. ممتد بين 2012 و2027. رؤساء الجماعات اللي جاو موراه حصلو فهاد العقد ولقاو راسهم فمواجهة مع هاد الشركة، حقاش المشكل في الأصل هو شباط.
الملايير ديال لفلوس اللي خاصها تجيب الشركة:
مصادر هضرات معاها "كود" باللي فاس دبا عندها 21 مليار سنتيم باش يجيو طوبيسات جداد وتجويد الخدمات، مجلس الجهة عاطي منها 7 مليار والجماعة 7 مليار والداخلية حتى هي حاطة دبا 7 مليار.
ذات المصادر كشفات باللي الشركة المفوض لها خاطها تحط ما مجموعه 22 مليار كيف جا فالملحق التعديلي اللي تصادق عليه هادي عام تقريبا، مشيرة إلى أن طوبيسات مستعملين مزيانين جاو لفاس.
وأشار باللي كاين 60 طوبيس من هاد الحفالات الجداد اللي خاصهوم يكون قريبا في المجموع هو 90 طوبيس مستعمل مزيان، لكن مصادرنا قالت باللي الشركة مطالبة باش تجيب 227 طوليس على من دبا 10 أشهر أو عام على أبعد تقدير.