كشف الناخب الوطني وليد الركراكي على السر ورا المناداة ديالو على محمد الشبيبي مفاجأة لاليست المنتخب المغربي لكوب دافريك 2023 فالكوت ديفوار، وعلاش عيط على نصير مزراوي وهو موعت. وتحدث الناخب الوطني وليد الركراكي اليوم الخميس فالندوة الصحافية اللي علن فيها ال 27 لاعب المشاركين مع المنتخب المغربي فكوب دافريك وقال: "باش ما نكدبش عليكم ايوب العملود هو اللي كان فلاليست قبل محمد الشيبي ولكن ايوب العملود توعت فماتش الوداد وحسنية اكادير والإصابة ديالو محتاجة لواحد 15 يوم وما كانش عندي الوقت مازال باش نعرفو واش غيكون واحد او لا". ووضح الركراكي: "محمد الشيبي كيلعب فبيراميدز كنعرفو وكيعرف لافريك وفايت جا ليكيب ناسيونال واخا ما سبقش له جا معيا، وغير باش نوريكم راه اللي كيستحق يجي ليكيب ناسيونال غيجي والشيبي وما كانش فلاليست واليوم الصباح دخل فلاليست وبصحتو وديوت معه وراه موتيفي، واذا تحتاجينها غيكون فالمستوى وعندو نيفو ديال المنتخب". وبخصوص نصير مزراوي نجم بايرن ميونيخ قال الركراكي: "نصير مزراوي توعت مع بايرن ميونخ يوم 17 دجنبر، والطبيب ديالنا سافر لميونخ باش نعرفو شنو عندو ودرجة الاصابة اللي عندو، بايرن ميونخ قدرو الرجوع ديالو بعد 6 السيمانات، وحنا قدّرناها بين 3 و 4 السيمانات، وغيجي معنا وغنوجدوه حيث كنتمناو نتأهلو للدور الثاني من كوب دافريك ويكون موجود وعندنا إيمان ان مزواري غيكون واحد فكوب دافريك وهو مهم لنا وللكروب".
