الناصري وبيوي واللي معاه. كل واحد فزنزانة كثر من 23 ساعة وكيخرج 20 دقيقة فالنهار وباش كيتلاقاو فالساحة ممنوع شي حد يهدر مع حد

علمت "كود" ان 20 شخص المعتقلين فقضية اسكوبار افريقيا فسجن عكاشة فكازا كيعيشو ايام كحلا. هاد 20 اللي قرر قاضي التحقيق هادي ايام يتابعهم ويديرهم فالاعتقال الاحتياطي منهم سعيد الناصري رئيس الوداد البيضاوي القيادي فالبام ورئيس مجلس عمالة انفا وفيهم عبد النبي بيوي رئيس جهة الشرق... تفرقو علي 20 زنزانة انفرادية. اي كل واحد كيعيش فزنزانتو بوحدو. ما عندو علاقة بالعالم الداخلي للحبس والحباسة.
وفق مصدر ل"كود" كيدوزو اكثر من 23 ساعة فهاد الزنزانة٬ وحتى هاديك 20 دقيقة باش كيخرجو يتمشاو٫ كتكون لحظات خايبة ليهم٬ يضيف مصدر من احد افراد عائلة معتقل منهم "باش كيخرجو يتمشاو فالساحة. كيكونو بوحدهم =اي 20= ولكن ممنوع الكلام او حتى السلام بيناتهم".
فهادو كاين اللي كيعيش وضعية نفسية خايبة بزاف يحكي مصدر "كود". شي وحدين ولاو عايشين غير فالسورڤيطات وطلقو اللحية" يضيف مصدر "كود".
دابا هاد الوضعية تقدر تستمر حسب قرارات قاضي التحقيق٬ حتى لعام. هاد الاخير غادي يبدا تحقيقاتو المفصلة ف25 يناير