واش الازمة بين باريس والرباط غاتشعل من بعدما كانت بدات تخمد؟. ماكرون اختار وزير للخارجية الفرنسية ضد المغرب ومع الجزائر ومورا قرار ادانة البرلمان الاوربي لبلادنا

علن الأمين العام لقصر الإليزي أليكسي كولر البارح الخميس، خلال تشكيل الحكومة الجديدة، تسمية ستيفان سيجورني وزير جديد للخارجية الفرنسية فبلاصة كاثرين كولونا اللي ترأست الخارجية من ماي 2022.
ستيفان سيجورني الامين الاعام لحزب ماكرون "الجمهورية إلى الأمام"، عندو نيكنايم وسط السياسيين، وهو رجل المهام القذرة للرئيس الفرنسي ضد بلادنا. علاش؟ هانتوما غتعرفو..
سيجورني قريب بزاف من ماكرون وسبق خدم كمستشار ديالو من 2020 ل 2021، وكان مسؤول على جمع التبرعات لحملتو فالانتخابات الرئاسية ف 2017.
وفعمر ستيفان سيجورني 38 عام، وتنتاخب عضو فالبرلمان الأوروبي، ورئيس لمجموعة "الماكرونيون" فالبرلمان الأوروبي.
وسيجورني هو اللي مورا دفع البرلمان الأوروبي لاعتماد بزاف دالقرارات ضد بلادنا، واحد كيتعلق بعدم "احترام حرية الصحافة" واخر عندو علاقة ب "قطرگيت"، وزيد وزيد، هاد الاتهمات طبعا نفاها المغرب.
تعيين الملك محمد السادس لسميرة سيطايل سفيرة للمغرب بباريس فأكتوبر اللي فات، كان عبارة عن بداية نهاية الأزمة بين الرباط وباريس، ولكن تعيين وزير للخارجية الفرنسية معروف بعدائه لبلادنا، كيخلينا نحطو عدة تساؤلات...
وبخصوص حياتو الشخصية، سيجورني كان اون كوبل مع گابرييل أتال، رئيس الوزراء الجديد.