توزيع ملابس الوفد الصحافي المغربي اللي غادي يغطي الكان فالكوت ديڤوار

تكلفت الجمعية الوطنية للإعلام والناشرين بتوزيع ملابس على الصحافيين اللي غيمشيو يديرو التغطية الإعلامية فالكوت ديفوار، لمشاركة المنتخب الوطني المغربي فكوب دافريك.
وبتنسيق بين الجامعة الملكية المغربية لكرة القدم واللجنة الوطنية الاولمبية ووزارة التواصل، تكلفت الجمعية الوطنية للإعلام والناشرين بتوزيع اقمصة على الصحافيين اليوم السبت فواحد لوطيل فكازا، باش يكونو لابسين لباس موحد وهما خدامين تماك فالكوت ديفوار.
واكد إدريس شحتان رئيس الجمعية الوطنية للإعلام والناشرين، ان هاد المبادرة الهدف منها هو إعطاء صورة مزيانة على الإعلام المغربي فكوب دافريك وعلى المغرب، وتكون مرحلة جديدة لتجاوز هفوات الصحافيين فالتظاهرات الرياضية الماضية.
شحتان اثار ايضا المجهودات الكبيرة اللي كتدار باش على الاقل تتوفر الظروف المزيانة من سكن وأكل تماك للصحافيين فالكوت ديفوار، وخصوصا فمدينة سان بيدرو وشدد على ان ما غيكونش البريستيج ولكن كيحولو يوفرو ظروف العيش.
وخداو الصحافيين الملابس ديالهم فجو ديال الفرحة، خصوصا وان هذه المرة غيمشيو مؤطرين فوفد اعلام فيه كثر من 100 صحافي، وغيكون على راس الوفد اللي غادي للكوت ديفوار ادريس شحتان رئيس الجمعية الوطنية للاعلام والناشرين وخالد الحري نائبو.