باش غينفع المنتخب المغربي ماتش ضد الاوروگواري ففرنسا وبلجيكا بعد الفشل امام المنتخبات الافريقية ؟

غيلعب المنتخب الوطني المغربي بنسبة كبيرة مع منتخب الاوروگواري ماتش أميكال، غيكون هو أول ظهور للأسود بعد الإخفاق فكوب دافريك "الكوت ديفوار 2023"، و الإقصاء من ثمن نهائي المسابقة الاهم فلافريك واللي كانوا مرشحين يربحوها.
الإعلام فالاوروگواي تطرق لماتشات أميكو ديال منتخب بلادو استعدادا لكوبا أمريكا، من بين وسائل الإعلام الاورگويانية اللي دوات على هذا الشي كاينة el pais UY، واللي كشفت ان منتخب الاوروگواي كان غيلعب ماتشات وديين فالشينوا، وما بقاش، والاتحاد الاورومواياني حسم واتفق مع منتخب الباسك باش يلعب معهم ماتش أميكال فإقليم إلباسك بإسبانيا، واتفق مع المغاربة باش يلعب منتخب الاوروگواي ضد المنتخب المغربي ماتش أميكال ففرنسا او بلجيكا وهذا الشي ما بين 18 و 26 مارس جاي.
هاد الماتش بين المغرب والاوروگواي إذا تلعب، غيخلي الاسئلة تاني تطرح حول شنو غيفيد المنتخب المغربي لعب ماتش ضد منتخب لاتيني، خصوصا بعد الإخفاق فكوب دافريك ضد منتخبات أفريقية متوسطة بحال الكونگو الديمقراطية وجنوب إفريقيا هذا الأخير اللي ربح المغرب رابع العالم فالمونديال، وعلاش ما يكونوش ماتشات وديين مع منتخبات أفريقية قوية تكون اختبار اعدادي للأسود قبل كوب دافريك "موروكو 2025"، وطبعا هاد الاسئلة بوحدو الناخب الوطني وليد الركراكي اللي عندو جواب عليها.