فينال قاصح فكوب دافريك بين الكوت الديفوار اللي باغيين اللقب الثالث ونيجيريا اللي كيقلبو على الرابعة

كتعيش القارة الإفريقية اليوم الاحد، عرس إفريقي فالكورة العنوان ديالو "فينال كوب دافريك كوت ديفوار 2023′′، بين الإيفواريين ونيجيريا، وكل واحد فيهم كيقلب على لقب جديد فالمسابقة الأهم فالقارة السمراء، واللي كتجي فالمركز الثالث من ناحية الأهمية ورا كأس العالم وكأس أوروبا.
فينال اليوم، هو الماتش الثاني اللي كيتلقاو فيه الكوت ديفوار مع نيجيريا فهاد كوب دافريك، والماتش الأول كان فالگروبات وربحوه النيجيريين بواحد لزيرو، وهذه المرحلة كانوا غيتقصاو فيها الإيفواريين اللي منظمين لاكوب ولولا المنتخب المغربي اللي كاليفاهم كأحسن ثالثة والبقية كلشي عارفها.
وبالرجوع للمواجهات بين الكوت الديفوار اللي كيقلبو على لقبهم الثالث ونيجيريا اللي عندهم 3 وباغيين الرابع، فهادي هي المرة الثامنة اللي كيتلقاو فيها المنتخبان بجوج فكوب دافريك، والإيفواريين رابحين 2 ماتشات مقابل 3 لنيجيريا و2 تعادلات، وآخر مرة خسرت الأخيرة مع الكوت ديفوار كانت فكوب دافريك 2008.
وكلشي كيتوقع أن الفينال بين الكوت ديفوار ونيجيريا غيكون قاصح، سوا للتاريخ ديالهم فالكورة او للمسار ديالهم بجوج فهاد النسخة، وهنا كندويو على المنتخب الإيفواري اللي رجعت فيه الروح بعدما كان مودع التظاهرة من الدور الأول وتأهل غير بزّز للثمن كأحسن ثالثة، وفالثمن فرگع مفاجأة كبيرة وأقصى السنغال حامل اللقب، وبعدها ربح مالي فالربع، ومن وراها تأهل للفينال على ظهر الكونغو الديمقراطية.
أما بالنسبة لنيجيريا تأهلت كثاني الگروب الاول بنفس رصيد المتصدر 7 نقاط، وقصات الكاميرون من الثمن المنتخب اللي كان من المرشحين للتتويج بهاد النسخة، وبعدها رحبت أنگولا فالربع، ثم ربحت جنوب إفريقيا فالدومي فينال وتكاليفات للفينال.
وبخصوص اللاعبين اللي يقدرو يديرو الفرق فهاد الفينال، فالكوت ديفوار معولين بشكل كبير على المجموعة كاملة، وعندهم 4 لاعبين ماركين هدف لكل واحد فيهم وما عندهمش هداف، ولكن كاينة أسماء اللي تقدر دير الفرق بحال فرانك كيسي وسيمون انديگرا، وبالمقابل نيجيريا عندها اديمولا لوكامان اللي عندو 3 أهداف ومنافس على الهداف ديال الكان والمتصدر هو إيميليو نسووي من غينيا الاستوائية، ومعولين النيجيريين وبشكل كبير على النجم ديالهم وأحسن لاعب إفريقي فيكتور أوسامين اللي مازال كلشي كيتسنى يبين الإمكانيات ديالو فهاد البطولة.
المنتخب الإيفواري وإلى جانب الكروب المقاتل اللي عندو واللي ما كيحطش يديه للأرض، معول على الجمهور ديالو يجي بشكل كبير لتيران الحسن واتارا فأبيدجان لمساندة الأفيال، بالمقابل النيجيريين غيحاولو يتحكمو فريتم الماتش وحماس الإيفواريين، وهذا الشي كامل كيأكد أن العالم اليوم عندو موعد مع فينال أحلام إفريقي من نوع خاص غيبدا مع 9 الليل بالتوقيت المغربي.