الوداد وصلو بخير لكازا وجايين من بوتسوانا بالمورال طالع ومركزين على ماتش لاسيك والتأهل

رجعت بعثة الوداد الرياضي من بوتسوانا إلى المغرب، والفريق غيبدا يوجد دابا للماتش ضد أسيك ميموزا الإيفواري السبت الجاي فمراكش، ضمن الجولة السادسة والأخيرة من دور مجموعات دوري أبطال إفريقيا.
ووصلت بعثة الوداد الرياضي إلى مطار محمد الخامس بالدار البيضاء قبل لحظات من نص ليلة الاثنين-الثلاثاء، وجات من بوتسوانا فطيارة خاصة مع نهضة بركان، ودازت الطيارة لمطار وجدة حطت لبراكنة عاد جات لكازا حطت الواك، وكانت معنويات لاعبين الوداد مرتفعة حيث راجعين بالرباح على گلاكسي البوتسواني ومركزين على الماتش الجاي ضد أسيك ميموزا الإيفواري.
ومن المنتظر يديرو الوداد الرياضي حصة تدريبية اليوم الثلاثاء، باش يحيدو عيا السفر، ويبداو يوجدو تحت إشراف المدرب فوزي البنزرتي الماتش المصيري ضد أسيك ميموزا الإيفواري، اللي مطالب فيه الفريق يربح ويتسنا شي كادو من عند گلاكسي البوتسواني ضد سيمبا التنزاني فدار السلام، وسوا يربحهم أو على الأقل يتعادل معهم باش يتأهلو الوداد كثاني الگروب 2 بعدما حسمو أسيك ميموزا الصدارة.