واش تعتاقل المتطرف أبو عمار لي كيحرض ضد المدارس العتيقة والصحافة؟ مصدر لكود: مازال مكاين والو

الروينة نايضة هاد اليومين بعد انتشار أنباء عن اعتقال الداعية المتطرف المعروف فسوس بالشيخ أبو عمار لي ماخلا فاش هضر وكان آخرهم الفقهاء والعلماء ديال سوس بالتزامن مع الموسم ديال التصوف "لالة تاعلات" السيمانة الفايتة.
وقبل مايهاجم أبو عمار العلماء و الفقهاء ديال سوس كان تهجم على الصحافية فرح الباز بسبب لباسها وقاليها ستري راسك، وقبل منها عاير الفنان المثقف أوطالب المزوضي.
الأخبار المتداولة كاتقول أن عدد من الشكايات ترفعات ضد أبو عمار وكاين شي أوديو كايدور فواتساب كايأكد كاع مولاه أن أبو عمار تشد.
مصدر مقرب من القضية قال فإتصال مع گود ان أبو عمار ماتشدش لحدود اللحظة ولكن مأكدش أن البوليس كايقلبو عليه ولا لا.
مصادر متطابقة أكدات أن البوليس كايقلبو عليه ومشوا لدارو مالقاوهش حيث باغيين استامعو ليه فقضية شي شكاية مرفوعة ضدو بدون ذكر الجهة لي رفعات عليه الدعوى.