دوك لي كانو البارح كايغوتو ضد احتكار عائلات ‘فاسية' للسلطة و القرار هوما لي اليوم ولاو كايمارسو احتكار السلطة فإطار عائلي و ولينا كانشوفو "آل لمحرشي" و"ال بلعسال" و"ال الراضي" "ال الرشيد" و"ال ابا""

من واحد الناحية،السياسة من شحال هادي كانت "مسألة عائلية" une affaire de famille، الواحد فاش كايكبر فأسرة سياسية، كايتأثر بيها و هاد القضية كاينة فالعالم كامل فميريكان كاين آل بوش، و آل كينيدي مثلا، ففرانسا المثال الحي هوا ديال جون ماري لوبين و بنتو و حفيدتو دابا لي واخدة المشعل ديال السياسة فالجبهة الوطنية، فالعالم العربي عندنا الأسد و ولدو ، فأفريقيا كاين عمر بونكو و ولدو، و الأمثلة عديدة سواء فدول ديموقراطية او دول العالم الثالت، المسألة تقدر تبان طبيعية فاش كاتشوفها فالأول، فحال واحد كابر فأسرة ديال التعليم، أغلبية ولاد المعلمين و الاساتذة كاتلقاهم كايقراو مزيان، الأطباء خلاص مدكوكة فيهم الشوكة و أي طبيب كاتلقاه ضروري باغي يوجه ولدو للطب باش يخلي ليه العيادة ،و داكشي علاش بزاف كايتقاتلو مع ولادهم باش يقراو فالمغرب و لا فاوكرانيا و لا السينيغال ماشي مهم المهم هوا الدري يولي "طبيب"! فالمخزن نفس الشيء ، كاتلقا المدارس العسكرية اليوم فمراكش و لا مكناس و لا كازة عامرة بولد الكولونيل الفلان فلاني ! بنت الكوماندار، ولد الكابيتان، البوليس غالبا ماكايخرج بوليسي حتى كايكون بلاصا ولدو و لا بنتو فبلاصتو. أي واحد كايدير الولاد و كايلقا راسو ديك ال carriere لي داز منها سلكاتو و صدقات ليه و شاف راسو داير منها لاباس كايحاول يوجه ولدو و لا بنتو ليها ! عكس واحد حوفار كايشوف راسو مكرفص و كايضرب تامارا راه طبيعي ماغايبغيش لولدو خلا دار بوه.
المشكلة ماشي فأن ولد كايتبع الكاريير لي دار باه حيت هادي مسألة عندها تفسيرات نفسية و اجتماعية معينة، المشكلة فالدول فحال ديالنا هوا ريحة المرقة لي كاتعطي من هاد النوع ديال التصرفات تحت شعار "لي عندو جداه فالعرس" المشكلة لي مديرونجيا بنادم و لي خلات الناس ينوضو يغوتو هي أنه السياسة لي نورمالمو بنادم كايمارسها حيت عندو شي شوية ديال المبادئ خاصو يدافع عليهم حتى هي "تمرقات"و بنادم ولا كايشوف السياسة وسيلة باش "يدير لاباس" هوا و ولادو و يدكوه فالدولة من بعد مادكوه فيها فالتعليم و الصحة و الوظيفة العمومية، المشكل ماشي فبنت البرلماني تولي برلمانية و ولد المستشار يولي تاهوا مستشار، المشكلة الكبيرة كيفاش ولا داك الولد برلماني؟ واش كاينة شي قضية بعدا ؟ شي خطة ؟ شي مبادئ؟ شي سياسة؟ و لا غا حيت البرلماني داق من كيكة المخزن و جاتو بنينة بغا تا داك الولد و لا البنت يدخلو يدوقو تاهوا من حقو ديال الكيكة, حيت بزاف هادشي على المؤثرات النفسية و الاجتماعية ! آآو كلكم نجحتو تحببو زعما السياسة لولادكم و عائلاتكم؟ شباط، بنكيران، اليازغي، الشوباني، الرميد، اليازغي، المحيرشي و الليستة طويلة كاع هادشي حب فالسياسة و العمل السياسي ؟ و ماشي معقول غدا و لا بعدو داك الولد و باه يصوتو على قوانين ضد للتوظيف و مع الخوصصة و يقولو لولاد الشعب الدولة مابقاتش قادة عليكم توظفكم باش دكوه فيها، و هو و باه و مو و خالتو كاملين داكينو فالدولة و عاضين فالبزولة بيديهم و سنانهم.
حنا مازالين بعاد بزاف على النموذج الأمريكي ديال آل كينيدي و لا الفرنسي ديال "لوبين" ، عارفين بلي كلشي كانگوملو فيه و حتى السياسة عندنا فيها ريحة الگاميلة، حيت ماشي ساهلة واحد شاب عادي ياخد تزكية من حزب كبير و يترشح باش يولي برلماني لاماكانتش موراه شي ضرسة صحيحة معاوناه و ضامناه و الضامن بشكارتو كيما كايقول المثل.
و الطامة الكبرى هي فاش كاتشوف، كاتلقا هاد الطبقة ديال النيو سياسيين هي لي كانت كاتغوت هادي سنين و كاتقول "باراكا من الاحتكار" لي كاتمارسو العائلات الفاسية فالسياسة، نضتو اليوم رومبلاسيتو سلطة و احتكار عائلات فاسية بسلطة و احتكار عائلات اخرى و صافي و بلاصة ماكنا كانسمعو غي باحتكار "آل الفاسي" ولينا تانشوفو حتى الاحتكار ديال السلطة كايتمارس من طرف هادوك لي كانو كايغوتو عليهم البارح "آل ابا" "آل الرشيد" "آل الشوباني" و "آل المحيرشي" و"ال الرشيد" و"ال ابا" المعروف بسبيسيال ببوجدور= و زيد و زيد و هادشي كايأكد حاجة وحدة المقولة الشهيرة ديال موحماد مول الحانوت" المغاربة ماشي ضد الفساد، المغاربة ضد الاستفادة منو".