البطولة: الحسنية خسرت مع بركان والزمامرة ربحو تطوان

خسرو حسنية أكادير مع الضيف ديالهم نهضة بركان اليوم الاحد فتيران أدرار فأكادير، برسم الدورة 23 من منافسات البطولة الاحترافية لكرة القدم.
وسالا الماتش بين حسنية أكادير ونهضة بركان بنتيجة 2 لزيرو لمصلحة البركانيين، اللي تسناو الشوط الثاني من الماتش وبالضبط الدقيقة 75 باش يماركيو الهدف الأول عن طريق يوسف الفحلي، وقتل يوسف الزغودي الماتش بهدف ثاني فالدقيقة الأخيرة، مع العلم أن اللاعبين بجوج اللي ماركاو على الحسنية هما ولادها ودابا كيلعبو مع بركان.
وبهذا الخسران تجمد رصيد حسنية أكادير عند 23 نقطة وكيحتل الفريق المركز 11، ونهضة بركان خداو 3 بوان بهاد الرباح رفعو بها رصيدهم إلى 33 نقطة فالمركز 5 مع جوج ماتشات مؤجلين.
وفنفس الدورة والتوقيت، خسرو المغرب التطواني فتيرانهم سانية الرمل فتطوان مع ضيوفهم نهضة الزمامرة بهدف واحد لزيرو، تماركا فالدقيقة الأخيرة من الماتش.
المغرب التطواني بهاد الخسارة بقات عندو 29 نقطة وكيحتل المركز 10، ونهضة الزمامرة خداو من هاد الرباح 3 بوان وطلعو للمركز 7 برصيد 32 نقطة.