ها علاش دياز اختار الاسود. اسباب قرار فكر فيه مزيان باش يكون معانا: كيفاش كبر بيه المغرب بزاف وهملوه الصبليون بزاف

كشفات "ماركا" اللي جابت سكوب اختيار ابراهيم دياز للمنتخب المغربي لكرة القدم٬ عن اسباب هاد الاختيار. اليومية الرياضية الصبليونية المعروفة بقربها مع ريال مدريد٬ نشرات غير شوية هادي مقال قدمات فيه الاسباب.
اليومية وضحات بللي قرار ابراهيم دياز عبد القادر للعب مع المغرب جا بعد 7 سنين ومنتخب اسبانيا تعامل باللا مبالاة وما تسوقش لهاد للعاب وما عيطتش عليه.
رقم 1/
قرار فكر فيه مزيان
كشفات "ماركا" بللي قرار دياز يلبس توني الاسود نهائي وحاسم وفكر فيه مزيان. واضافت ان دياز فكر مزيان باش ياخد هاد القرار النهائي وباللي واقف هاد القرار اجراءات ادارية للبحث عن حلول قانونية بخصوص الجنسية المغربية اللي حصل عليها ومدى تطابقها مع القوانين فالصبليون. هاد الشي دارو باشراف محامين توضح "ماركا"
رقم 2/
لا الاتحاد الصبليوني لكرة القدم.
السبب الثاني لاختيار دياز للمنتخب المغربي هو عدم استدعاؤو من قبل منتخب اسبانيا٬ فاستثناء ماتش اميكال وقت "كورونا" مع اقل من 21 سنة٬ ما عمر الاتحاد الاسباني لكرة القدم ما كونڤوكا براهيم٬ كثر من هاد الشي٬ تضيف "ماركا"٬ ما عمر هاد الاتحاد عيط لابراهيم باش يقول ليه راه داخل فشي مشروع فالحاضر او المستقبل. هاد. الشي داروه مع لعابة بحال لامين وعبديل رويز وانسو ويريمي اللي بحال حالة دياز.
رقم 3/
دياز قضية دولة فالمغرب اللي قدم ليه مشروع كامل
السبب الثالث لاختيار دياز الاسود٬ وضحاتو "ماركا" فكون المغرب سبق نادى على اللعاب٬ وقدمو ليه اليوم مشروع كبير للحاضر والمستقبل٬ فيها كأس افريقيا للامم ف2025 اللي غادية تنظم فبلادنا٬ وكأس العالم 2026 بامريكا وحتى تنظيم كأس العالم 2030 باسبانيا والمغرب والبرتغال. هاد الطريقة فالتعامل خلات اللعاب يعجبو المشروع ويثيق فيه ويختار التوني