شكون ياسين كنجا اللي قتل رجل دين فالخزيرات؟ كان سكايري وحشاشي امو وخوتو فطنجة وخوه اخر مشدود فالصبليون والمغرب ما عتارفش بيه وكان حارگ وكيتسنى يرجعوه ونهار الجريمة الارهابية تناگر مع صحابو

قدم قاضي المحكمة الوطنية معطيات على الجريمة الارهابية اللي وقعات الخزيرات جنوب اسبانيا واللي ارتكبها ياسين كنجا٬ 25 عام. وفق تصريحات القاضي "لاربعا 25 يناير 2023 باش كان فالساحة. طعن =رجل الدين= وباش طاح٬ هز =سيفو= بجوج يديه وهز راسو للسما وگال شي كلمات منها "الله".
حسب المعطيات الاولى للتحقيقات٬ دابا تركيز على اش غادي يخرج من تلفونو ومن الناس اللي كيعرف. فالدار اللي ساكن فيها مع جوج خراين لقاو تمجيد للفكر الجهادي.
وحسب ما نشرته وسائل الاعلام الصبليونية فان ياسين من اصل مغربي٬ وصل حارگ لجنوب اسبانيا من جبل طارق. كان قرار بترحيلو ماشي للمغرب ولكن لجبل طارق. علاش؟ يمكن حقاش المغرب ما قبلوش. باش تقبل حراك خاص معطيات تؤكد باللي مغربي٬ لكن احد القضاة قال فقناة "الاولى" الاسبانية باللي يمكن باش خرج قرار ترحيلو كانت العلاقات بين الرباط ومدريد ما مزياناش. ماشي بحال دابا.
دابا شكون هاد ياسين؟ من عائلة ساكنة ف"واد المرسى". بعيدة على سبتة بشي 6 كلمتر وتقريبا قبالة جزيرة ليلى. هاد البلدة المغربية عاش فيها ياسين وامو وباه و3 من خوتو. دابا ماماه كاينة فطنجة وباباه كيقولو مازال فالدوار ولكن ناسها كيقولو شحال هادي ما شافوه. جوج من خوتو عايشين مع امهم فطنجة وثالث كان حرك فاسبانيا ومشدود تماك.
سكان الدوار هدرو٬ وفق ربورطاج دارتو "ايفي" ونشروه فصحف صبليونية٬ على ولد عادي. ياسين كان كيتبوق ماشي غير بالحشيش بمخذرات اخرى. فقيه الدوار قال باللي كان كيصلي عندو وما عمرو لاحظ فيه شي تحول
حتى هادوك اللي كانو ساكنين معاه فالخزيرات ما لاحظوش فيه شي تحول حتى فليام اللخرة. وقف لحشيش وما بقاش كيسكر ويشر وبدا كيهدر على التطرف ولحلال ولحرام وشكون المسلم وشكون اللي ماشي مسلم ونهار الجريمة اي ول البارح لاربعا ضارب مع واحد فيهم قبل ما يخرج.
دابا الصبليون معولة على المغرب باش تعرف هاد ياسين. دوز شي ايام فصبيطار فطنجة. لكن وقتاش ولى متطرف؟ هاد الشي اللي غادي نعرفوه فالتحقيق.
واش كاينة شي علاقة بحرق قرآن فالسويد وهولندا وبين هاد العمل الارهابي اللي تقتل فيه رجل دين وتصاب اخر وتزگل ثالث. كلشي يبان مع التحقيق.