صورة "المورو" فالصبليون اليوم زوينة. اعلامهم هدر على فضيحة البيرو والبوليس وتسامح لمغاربة بعد ما سبهم مستخدم فلوطيل اللي سكنو فيه

اليوم الاعلام الصبليوني هدر على ماتش المغرب ضد البيرو هاد العشية فملعب اتلتيكو مدريد بالعاصمة الاسبانية. الحدث طبعا ما كانش الماتش الحبي. اللا. الاحداث اللي دازت البارح وول البارح. القناة الاولى الاسبانية مثلا ها كيفاش نقلات الاحداث اليوم 28 مارس 2023.
بدات بربورطاج على اللي وقع البارح فاوطيل اقامة منتخب البيرو. بوليسي تشابه ليه لعاب من البيرو مع الجمهور وضربو. اللعاب اللي هو حارس المرمى خدا حقو وعطا للبوليسي. القضية وصلات للكوميسارية. سمعو ل4 لعابة منهم الحارس اللي ما طلقوه حتى الربعة الصباح.
جابو تصريح لمسؤول امني اسباني قدم الرواية وعطاو رواية المنتخب البيروڤي. بان من الربورطاج كاين تحيز للرواية الاسبانية. هاد الشي غادي يبان اكثر. حيث بعد بث هاد الربورطاج بفيديو للمضاربة هدرو على حدث اخر وقع للمنتخب المغربي. حدث وقع فاوطيل "اورو سطار" فشارع لااسبانيولا وسط مدريد.
المستخدم اللي كيستاعن بيه هاد لوطيل٬ كتب فحساب شخصي ليه فالتواصل الاجتماعي باللي كيخدم اللعابة والمنتخب بسبب معتقداتهم "اللعيبة" فاشارة الى رمضان والسحور والفطور. واضاف "انتوما لاعبو الكرة المورو اللعينين" واكد باللي ما كيحتارمش "رمضان ولا سخافتو".
الربورطاج فالقناة الاسبانية ما هدرش على هاد التفاصيل٬ جاب غير الحادثة ومن بعدها دوز تصريح ذكي بزاف للمدرب وليد الركراكي وباللغة الاسبانية قال فيه باللي هادا شاب وباللي الاسلام دين تسامح وخاص يسامحو هاد الشاب ويعرفوه على قيم التسامح فالدين الاسلامي. هادا هو اللي دوزوه فالاخبار بالقناة الاولى الاسبانية هاد الصباح.
يعني كاين التسامح للي هو المغرب وكاين العنف اللي هو مع البيرو. فالصبليون ديما كانت صورة سلبية على "المورو"٬ كان الشي بدا يبدل شوية بالشوية. التقارب المغربي الاسباني ثم الاعلان عن تنظيم كأس العالم المشتركة بين المغرب واسبانيا والبرتغال وقبلها فوز الاسود ضد "لاريوخا" فثمن نهاية كأس العالم بقطر كلها عوالم لعبات فتحسين صورتنا عند الجارة الشمالية.
اليوم كان مرحلة اخرى من هاد الصورة الزوينة على بلادنا عند جيراننا الصبليون.