شاعلة فاجتماع اللجنة التنفيذية لحزب الاستقلال..مضيان بطل التسجيل الصوتي على المنصوري متمسك برئاسة الفريق البرلماني وقيوح كيقلب على راسو بسباب الازمة المالية اللي كيعيش والحسم بيد تيار ولد الرشيد

علمت "گود" من مصدر مطلع أن اللجنة التنفيدية لحزب الاستقلال، دايرا اجتماع حاسم فهاد الاثناء، للنظر في عدد من الملفات المثيرة خصوصا فضيحة التسجيل الصوتي اللي تورط فيها رئيس الفريق البرلماني للحزب نور الدين مضيان وكذا وصول فضيحة تفويت صفقات الدراسات لشركات محظوظة منها شركة خديجة الزومي بلا فتح باب المنافسة.
الاجتماع اليوم كذلك خصص للحسم في اللجن ديال المؤتمر، ورئاسة المؤتمر والأوراق اللي غايتك التصويت فيها، وكذا النظر في حصيلة وزراء الحزب استعداد للجلسة المخصصة لنصف المرحلة الحكومية واللي غايقدم فيه عزيز اخنوش الخطوط العريضة لحصيلة عامين ونص من التدبير الحكومي امام البرلمان بغرفتيه.
وحسب مصادر "گود" مضيان واخا عندو ملف فالقضاء، مزال متمسك برئاسة الفريق، ودار تحركات باش يتم التصويت عليه شخصيا ويتعطا اسمو لرئاسة مجلس النواب يوم الاثنين، اي قبل 48 ساعة من عملية تشكيل الهياكل بشكل رسمي.
الهضرة للي دايرا بشكل قوي داخل الفريق الاستقلالي للي كيعيش أسوأ مراحل تاريخه خصوصا بعد فضيحة التسجيل المنسوب لرئيس الفريق نور الدين مضيان، وتوالي الفضائح التي وصلت للقضاء. بحيث اللي بان محسوم حاليا هو أن عمر احجيرة هو الاقرب لمنصب رئيس الفريق.
عبد الصمد قيوح، واحد من كبار أعيان فسوس، لي فشل يفرض اسمو ضمن الأسماء المقترحة للتعديل الحكومي، باغي يشد منصب النائب الثاني لرئيس مجلس النواب بلاصت خديجة الزومي، واخا أن الأخيرة تعتبر من أعمدة حزب الاستقلال وصعيب تنازل إلا بمنصب كبير مقابل هادشي وغالبا تعين سفيرة فأمريكا الثلاثينية.
قيوح كيعيش ازمة مالية وفقد الكثير من النفود وعندو مشاكل مع برلمانيي الاستقلال فسوس، وعلاقتو ممزياناش مع الحليف ديالو الاحرار، فسياق كيعرف فيه المغرب سقوط الاعيان والمستفيدين من ملايير الدعم العمومي في قطاعات مختلفة بعضهم متابع في ملفات تبديد هذه الاموال.