كواليس السياسيين فالعيد.. شاعلة حروب على مناصب مجلس النواب: مضيان فالتوش واحجيرة بلاصتو وقيوح عينو فمنصب الزومي وقيادة البام تالفا والحركة قاضيا الغرض بلا صداع

العيد عند بعض السياسين والبرلمانيين مختلف، كولشي كيسول على الوزيعة الجديدة لي غاتكون فالهيكلة الجديدة لمجلس النواب، خصوصا مناصب لي عندها مكانة خاصة بحال نواب رئيس المجلس ورؤساء اللجان الدائمة.
وحسب مصادر "گود"، فإن تبادل التهاني بين البرلمانيين لم يخلوا من بعض الأسئلة المحرجة من قبيل شكون يجي بلاصت فلان فمنصب علان، خصوصا المناصب الكبيرة فثالث مؤسسة فهرم الدولة (مكتب مجلس النواب).
التسريبات ديال العيد كتقول بلي الحرب نايضا على هاد المناصب، وكاين للي تحسم اليوم، منها الهضرة للي دايرا بشكل قوي داخل الفريق الاستقلالي للي كيعيش أسوأ مراحل تاريخه خصوصا بعد فضيحة التسجيل المنسوب لرئيس الفريق نور الدين مضيان، وتوالي الفضائح التي وصلت للقضاء. بحيث اللي بان محسوم حاليا هو ان عمر احجيرة هو الاقرب لمنصب رئيس الفريق.
عبد الصمد قيوح، واحد من كبار اعيان فسوس، لي فشل يفرض اسمو فالاسماء المقترحة للتعديل الحكومي، باغي يشد منصب النائب الثاني لرئيس مجلس النواب بلاصت خديجة الزومي، واخا ان الاخيرة تعتبر من اعمدة حزب الاستقلال وصعيب تنازل الا بمنصب كبير مقابل هادشي وغالبا تعين سفيرة فامريكا الثلاثينية.
اما بخصوص حزب الاصالة والمعاصرة، مازال كولشي قابل للتغيير في اخر اللحظة، لكن المفاجأة هي ان صلاح الدين ابو الغالي هو واحد من القيادة الجماعية باغي رئاسة لجنة الداخلية بلاصت محمد ودمين المحسوب على الامين العام السابق عبد اللطيف وهبي.
فالبام نيت، نفس الشيء بالنسبة لمنصب النائب لرئيس مجلس النواب اللي فيه محمد الصباري (اسرع نقيب للمحامين دوز 48 ساعة نقيبا لهيئة المحامين بمراكش وطاح دغيا بسبب مرافعاته لصالح الانفصاليين المعتقلين بالمغرب)، غاتجي بلاصتو نجوى كوكوس رئيسة المجلس الوطني للبام، واخا عندها مسار "فاشل" فالدبلوماسية البرلمانية وكولشي عارف الاخطاء لي دارت فالجزائر وكيفاش تحيدات من المكتب التنفيذي لمنظمة التعاون الاسلامي.
لكن الغريب فالبام هو انه دغيا بدا يسرع فالمناصب اللي فيها التعويضات (مجلس النواب) في حين مزال مقدرش يدير تشكيل المكتب السياسي.
اما حزب الحركة الشعبية، فالمعارضة، كيف ديما ديما كيسلكو راسهم وكيقادو الوزيعة بالتفاهمات وصداعهم قليل لي كيسمعو، الحزب حاليا فيه جوج اقطاب قويين، محمد اوزين اللي هو الامين العام، وادريس السنتيسي القطب ديال التنظيم ورجال الاعمال والمكانة ديالو قوية فالبرلمان، خصوصا بعد سقوط الاعيان الكبار فالحزب من قبيل محمد مبدع المدان على خلفية ملفات فساد مالي.
الاتحاد الاشتراكي باقي تالف، رئيس الفريق محمد شهيد ضاربها بسكتة، هو واحد من المحسوبين على ادريس لشكر، صمتو على فضيحة صفقات الدراسات يؤكد بلي مقادرش ياخد مبادرة ويحرر الفريق البرلماني من سلطة لشكر، فالمقابل كيكون نواب قادرين يترأسو الفريق ويعطيو نفس قوي للمعارضة الاتحادية.
بحال شهيد المعروف بلغة الخشب، ميصلحش يقود رئاسة فريق الاتحاد الاشتراكي بمجلس، يقول مصدر من المعارضة.
في المقابل حافظ فريق التقدم والاشتراكية على توازنه، خصوصا وان رئيس الفريق رشيد حموني، غير محسوب على الامين العام محمد بنبعد الله، كما ان حموني عندو بعض المواقف مختلفة عن بنبعد الله ويعتبر من الاصوات الرافضة للتنسيق مع عبد الإله بنكيران زعيم البي جي دي.
البي بي اس دبا فيه جوج ريوس كيتنافس على الشرعية السياسية والقوة الاقتراحية والتصريحات، بنبعد الله من جهة اللي دوز اربع ولايات على رأس الحزب، وبين وجه ابان على قدرة فالتواصل والنقاش والمعارضة بشكل مؤسساتي داخل البرلماني ودائم التواصل مع الصحافة