نايضة فبرشيد: المدني رئيس اليوسفية باغي يطير شركة النادي بعدما البيضي استقبل العصبة الاحترافية

مازال نايضة فيوسفية برشيد لكرة القدم بين رئيس الجمعية الرياضية للنادي فتح الله المدني ورئيس الشركة الرياضية للنادي نور الدين البيضي، وهذا الشي مأثر بزاف على الفريق اللي كيعاني فالبطولة ومهدد يطيح للقسم الثاني.
مسلسل الصراع داخل بوسفية برشيد كيبان أنه مازال طويل، وهاد المرة رئيس الجمعية ديال النادي فتح الله المداني، وحسب وثيقة كيتوفر "گود" على نسخة منها، غيدير اجتماع للمكتب المسير ليوسفية برشيد الثلاثاء الجاي، وباغي يناقش في الديون اللي على الفريق وجدول ديون النادي، وإلغاء اتفاقية الشراكة ما بين الجميعة ديال يوسفية برشيد اللي كيترأسها هو (المدني) والشركة الرياضية للنادي اللي كيترأسها نور الدين البيضي.
وكيجي هذا المستجد، بعدما دارت لجنة التتبع التابعة للعصبة الوطنية لكرة القدم الاحترافية زيارة اليوم الخميس، لإدارة ومرافق النادي الرياضي ليوسفية برشيد واستقبلها رئيس الشركة الرياضية ليوسفية برشيد نور الدين البيضي، والهدف من الزيارة حسب يوسفية برشيد، هو الوقوف على حالة النادي بالنظر مع شروط دفاتر التحملات المؤسساتية، اللي كترتكز أساسا على أساليب ومناهج تطبيق الحكامة الجيدة فشقها الإداري والقانوني والمالي والبنيات التحتية.
للإشارة فالصراع بين الطرفين تسبب فغياب يوسفية برشيد على ماتش المغرب الفاسي السبت الماضي ضمن منافسات البطولة الاحترافية، حيث الفريق ما لقاش باش يديبلاصا من برشيد لفاس وفين يبات قبل ما يتدخل العامل والباشا وحلو المشكل وسافر الفريق فأخر لحظة مع 4 الصباح ديال نفس اليوم اللي لعب فيه الماتش.