دارو نهضة بركان اول حصة تدريبية لهم فالجزائر، وهي الحصة التدريبية الاخيرة قبل الماتش ضد فريق اتحاد العاصمة الجزائري، اللي غيتلعب غدا الاحد فدومي فينال كاس الكونفدرالية الافريقية، وهذا الشي بعدما دارو حصة تدريبية خفيفة البارح فمطار هواري بومدين اللي كانو گالسين فيه بسبب مضايقات سلطات الكابرانات واحتجازها تونيات الفريق بلا موجب شرع، والسبب هو أن توني بركان فيه خريطة المغرب. Loading Ad 00:00 / 00:00 ومشاو نهضة بركان السبت بالليل تريناو فتيران 5 جويليي فالعاصمة الجزائرية الجزائر، وحاول المدرب معين الشعباني هو والطاقم التقني ديالو يوجدو الفريق للماتش بدنيا وذهنيا، بالإضافة للجانب النفسي اللي خدامين مع اللاعبين عليه باش يتجاوزو تأثير مضايقات السلطات الجزائرية عليهم ملي وصلو للجزائر البارح الجمعة. نهضة بركان تدربو بشكل عادي ووجدو للماتش بطريقة عادية بحال گاع الماتشات، باش ما يخليوش شي حاجة للصدفة، ورجع الفريق للوطيل فين گالسين يرتاحو، ويتسناو قرار السطات الجزائرية واش غيرجعو التونيات للفريق أو ما غيرجعوهمش، وبناء على هذا الشي غيعرفو نهضة بركان واش غيلعبو الماتش غدا الاحد ضد اتحاد العاصمة او ما غيلعبوش. كان الاتحاد الأفريقي لكرة القدم راسل السلطات الجزائرية، وحذرها أنها إما ترجع تونيات نهضة بركان للفريق، وإما غيتعاقب فريق اتحاد العاصمة الجزائري ويخسر الماتش أمام نهضة بركان، حيث توني الفريق البرتقالي اللي فيه خريطة المغرب عندو اعتماد الكاف ملي بدات المسابقة، والسلطات الجزائرية ما عندهاش الحق تحجز على التوني.
