دردشة " كَود" مع أيوب بوشان: " نبيل بنعبد الله جاب لينا 5 وزارات بعدد متواضع من البرلمانيين و سندافع باستماتة عن التجربة مع البيجيدي .. أنا مدير ديوان وزيرة الداخلية ومتفق مع حركة الستاتيين الجدد "

-كَود: تانتا ترشحتي باش تكون عضو في اللجنة المركزية؟
-أيوب: نعم و مانجحتش.

-كَود: كيفاش كلشي المؤتمرين ترشحوا و كل واحد صوت على راسو و كلشي فرح و نشط ، أول مرة فالتاريخ أكثر من ألف شخص ف اللجنة المركزية، ماكاينة تا عند الحزب الشيوعي الصيني هاد القضية .
- أيوب: لا كاينين رفاق ماترشحوش ، أنا مامثلثش فرع و لكن مثلت منتدى طلبة المغرب لي هو جمعية موازية و هاد الأخيرة التمثيلية ديالها ضعيفة فاللجنة المركزية و كانعتبر بلي الكم الهائل ديال الترشيحات شيئ صحي .

- كَود: باش صحي؟ ملي كلشي بغا يدخل الأجهزة التنفيذية، هذي إما خطة لاغراق المؤتمر و إفشاله يا إما المؤتمرين ما تغداوش مزيان.
-أيوب: لا سمح لي، التوجه العام كان هو التقليص من عدد أعضاء اللجنة التنفيذية ، لكن انا كانقول صحي لأن الرفاق شافو انفسهم قادرين على تحمل المسؤولية و أهل لها و هذا جيد، و الناس تغدات مزيان و شاط الخير

- كَود: وضع عدد كبير من الترشيحات باينة هي خطة من تيار بن عبد الله لارهاب و ابتزاز خصومه و هو ما نجح فيه فعلا ملي انسحبوا.
- أيوب: لي مابغيتوش تفهمو هو أن المؤتمر كامل - إلا أقلية - كانت مناصرة لنبيل هذه حقيقة يجب التعامل معها و تقبلها ، نبيل بن عبدالله قام بعمل جيد في ولايته الأولى رفقة الرفاق ف الديوان السياسي .

- كَود: علاش انسحب السعدي و الصقلي من المنافسة على الأمانة العامة؟
- أيوب: لا يمكنني أن أقول أكثر مما قالته للا نزهة ، بغات تحافظ على وحدة الحزب و الرفيق السعدي هو خرج على راسو سياسيا.

- كَود: أي حزب هذا اللي الوحدة ديالو مهددة بمجرد نية عضو فيه ممارسة حق من حقوقه وهو الترشح للأجهزة؟
-أيوب: انا مايمكنش نقرا لللا نزهة داكشي لي فراسها ، هي فهمات بلي ممكن أن استمرارها فالترشح غادي يخلق مشاحنات بين الرفاق ، أنا ماباليش هادشي بالعكس عجبني أن النساء يتقدمو للترشح و بغيت أن واحد النهار تكون عندنا أمينة عامة

- كَود: بصح كانو مدابزات وكان اعتداء جسدي على عضو في المكتب السياسي؟
- أيوب: دابا الموشكيلة لاحظنا واحد التحامل غير مسبوق على الحزب من طرف الصحافة، كان الجو مشحون كنا على الأعصاب ، مني و جبد راه كان بلوكاج رهيب ، لكن ماكانوش المطايفات ، و قرأت فالصحافة أن الرفيق الذي اتهم زورا بالاعتداء على الرفيق الآخر من أحسن الأطر في الحزب ، أعرفه شخصيا ،شخص منفتح على جميع الآراء و لا يمكن ان ينزل إلى ذلك المستوى كان شوية ديال النكير لكن داكشي داز

- كَود: دابا انت باين من تيار بن عبد الله، شنو هو برنامجكم انتما بالمقارنة مع تيار السعدي أو كرين ؟ برنامجكم هو ديما المشاركة في الحكومة و اللي قالها سيدنا هي اللي تكون.
- أيوب: السؤال لي خاص يتطرح شنو هي أوجه المقارنة بين ماقدمه السعدي مع ما قدمه نبيل ، الرفيق السعدي أحترمه و هو من كبار أطر الحزب لكن ماذا أعطى للحزب؟ نبيل بن عبد الله عطا الحزب مكانة مهمة داخل الساحة السياسية دافع على الحزب في مفاوضات تشكيل الحكومة و خدينا 5 الحقائب وزارية وازنة بعدد متواضع من المقاعد البرلمانية ، نبيل بن عبد الله فتح الحزب على جميع مدن المملكة و دفع المناضلين للتواصل مع المواطنين و هذا خلق إشعاع كبير ، و الدليل هو أنك تاتسولني دابا، الصحافة مهتمة كاين لي موضوعي و كاين لي الله يسمحليه.

-كَود: نجاح حزب هو الا شد وزارة و طبق فيها برنامجو ماشي غير يدخل أي حكومة و صافي، دخلنا عليك بالله دابا ماذا يجمع حزب شيوعي سابق مع العدالة و التنمية و الأحرار و الحركة الشعبية ؟
- أيوب: حزب التقدم و الاشتراكية تخلى عن المنهج الشيوعي سنة 95 ، ما يجمعنا فالحكومة هي تقاطعات محاربة الفساد و الاستبداد و التحكم و تحقيق العدالة الاجتماعية. حنا ماداخلينش للحكومة و صافي ، لك في حصيلة وزير الصحة أكبر مثال

- كَود: كتهضر بحال شي عضو ف الييجيدي
-أيوب: لا ولكن أنا كاندافع على التجربة مع البيجيدي باستماتة كاع

- كَود: كيفاش غادي تحاربو الفساد مع احزاب ادارية؟
- أيوب: ماهو التعريف ديال حزب إداري ؟ إذا كان حزب إداري هو الحزب الذي يناضل داخل المؤسسات فمرحبا به

- كَود: لا هداك تعريف حزب إصلاحي، الحزب الإداري هو حزب أسسه المخزن في ظروف خاصة وليس له برنامج و هدفه تمييع الحياة السياسة و مكون من أعيان و قدماء البوليس، يعني خرج من دهاليز وزارة الداخلية، هاذا راه مصلطح استعملوه رفاقك من زمان لوصف الأحرار و غيرهم ماشي أنا اللي جبتو من راسي.
- أيوب: و أين هو العيب في التعامل مع الواقع و الحاضر ، انتخابات 2011 جابت لينا هاد الاحزاب بمقاعد محترمة اختارها الشعب.

-كَود: اوا خص يكون حد أدنى من التوافق ف البرامج باش تتحالف و تعقد حكومة منسجمة. يالاه اقنعني انت بصواب التحالف مع البيجيدي و الأحراردابا.
- أيوب: آش جاب هادي لهاديك ، انت دابا تاتهدر لي على خلافات سياسية نابعة من الإيديولوجيات، آسيدي انا كانقولك ، زمن الايديولوجيات قد ولى دابا العمل إلى عندك شي رجال دولة أكفاء داخل الحزب ديالك جبدهم

- كَود: وراه هادشي كنقول دابا.. انتما تيار بنعبد الله مخزنتو الحزب و خرجتو عليه.. حسبي الله و نعم الوكيل فيكم.. اش بقا ف الحزب الا حيدتي منو الايديولوجية؟ اش كايجمع المنخرطين و اش كايفرقهم على اي تجمع اخر مثل شركة ربحية من غير الأفكار و الايديولوجية؟
- أيوب: و راه قلت ليك حنا متوافقين حول العمل في إطار المؤسسات ، و وقفنا في وجه هؤلاء اللذين أرادو تمييع الحياة السياسية ديال بصح و هادشي وقع يالاه البارح و المغاربة ماغاينساوهش

- كَود: من تقصد؟ البام؟ راه غدا ولا بعدو غادي تدخلو معهم شي حكومة و تقولو نفس التبرير، بعدا البام أقرب ليكم من البيجيدي و الأحرار، على الأقل فيه يساريين قدمى و برنامج حداثي.
-أيوب: دابا ملي قلتي لي نتحالفو معا هادوك وانا نقيس الخشب. أنا ماشي هيئة تقريرية داخل الحزب ، إلا كنا غادي نتحالفو مع البام غادي نعبر على التحفظ ديالي و رأي الاغلبية سيطبق.

- كَود: فين وصلات حكومة الشباب الموازية؟
-أيوب: نقوم بعدة لقاءات مع وزراء لنقل هموم الشباب المغربي.

-كَود: كان وقع شي مشكل عندكم.. اتهامات باختلاس ولا مانعرف.
-أيوب: لا ديك الساعة ماكنتش أنا.. انا ما جيت حتى للنسخة الثانية ،ماعنديش معلومات وافية حول الموضوع و ماقلبتش أصلا حيث حنا ولاد اليوم و لا يتعلق الأمر باختلاس ، فقط خلاف بين الزملاء

-كَود: دابا أنت وزير الداخلية ف داكشي؟
- أيوب: أنا مدير ديوان وزيرة الداخلية.

- كَود: تا أنتما دايرين ديوان لكل وزير؟ مالكم على هاد البيروقراطية و التبذير ؟
- أيوب: إيوا راه خدامين زعمة ماكانقشبوش ، كانشوف بلي مايمكنش وزير يخدم بلا مستشارين

- كَود: و شكون كايراقب عمل حكومة الشباب ؟ برلمان الطفل؟
- أيوب: حكومة الشباب ماشي مسرحية و إنما تجربة جادة لمساعدة الوزراء الدستوريين فبعض القطاعات، إذن داكشي خاص يكون على حقو و طريقو حنا ماكانمارسوش السلطة باش نتراقبو من مؤسسات ، ممكن أن الشباب المغربي يراقبنا كيشوف واش كانوصلو الانشغالات ديالو للسلطة ولا لا.

-كَود: دابا انت داخل ف حزب و ف منظمة طلابية و حكومة شباب و ف نفس الوقت خاشي راسك مع الستاتيين الجدد اللي هي حركة تعبر عن اليأس من الحياة السياسية في المغرب ..مالك على هاد التناقضات؟ ماتقليش الحوت علينا كما قال الستاتي.
- أيوب: أنا ماعجبنيش ما يحصل فالساحة السياسية و لكن لست يائسا و حتى الستاتي راه كيقول شي حوايج لي ممكن تعتابرهوم نبراس فحياتك مع الآخرين أوفي مواجهة الخصوم السياسيين

-كَود: الا كنتي وزير داخلية ديال بصح شنو غادي دير؟
- أيوب: سأعيد النظر في أمن المواطنين و أشتغل على هيبة الدولة يعني سأكافح التشرميل ،هناك بعض التسيبات الأمنية في المدن الكبرى يجب وضع حد لها.

- كَود: التشرميل راه غير تباهي شباب فقير ب ملابس باهظة الثمن ، خص تفرقو على الكريساج، هذو ظاهرتين مختلفتين ..ياك انت باحث ف العلوم السياسية خص تعرف هادشي؟
- أيوب: أنا طالب العلوم السياسية و الرأي ديالي راه كتبتو فاحدى الجرائد، دابا أنا كانهدر معاك هدرة عفوية ، تجردت من بزة طالب العلوم السياسية أمامك نعامس و المقصود بالتشرميل هنا هو حين يصبح كريساج .

-كَود: دابا أنت ف ديوان وزيرة الداخلية، وخا ديال بلعاني، غادي تكون كتعرف الناس، ماغاديش تدير ليا شي تدخل ؟
-أيوب: عرفتهوم تال راسي، المغرب مابقات فيه محسوبة.

- كَود: مابقات فيه محسوبية.. فين عايش أنت؟
-أيوب: غير ف الرباط .