ها كيفاش كانوا غادين يدبحو الفنان الخياري فسوق الاربعاء الغرب فعيد ميلادو 50. "كود" تكشف تفاصيل ليلة بدات ضحك وسخرية وكانت غادية تسالي دم. هذه رواية الفنان كما قدمها ل"كود"

كاد الحفل الاختتامي لمهرجان سوق الاربعاء الغرب السبت الماضي ان ينتهي بجريمة ذبح، حسب ما علمت "كود"، المستهدف فيها هو الفنان محمد الخياري. "بعد ما ساليت الحفل خبراتني نجاة اعتابو باللي صهر رئيس الجماعة جا كيقلب علي وهاز موس كبير. جاي باش يذبحني" يحكي الخياري ل"كود".
ما أنقد الفنان هو انه ما ان أنهى فقرته في السهرة الختامية بسوق الاربعاء الغرب عاد الى بيته في الدار البيضاء مباشرة، "من حسن الحظ انني ساليت مشيت" يضيف الفنان ل"كود".
ولكن علاش هاد الجريمة كانت غادية توقع؟ رئيس المجلس البلدي مع قربات الانتخابات دار مهرجان فمدينتو، كانت فيه ثلاث ايام ونهار الاختتام اي السبت الماضي حضرات 130 الف متفرج حسب ما نشرته مواقع محلية. كان فالاختتام الخياري وحميد القصري ونجاة اعتابو. الخياري جابوه باش يضحك ويقدم عروضو الساخرة.
وهاد الشي اللي كان. نقل اللي كاين فالمدينة. 30 عام ما تغيرات مازال فيها الغبرة والحمري وكال ايلى كان فاصيلة بنعيسى راه كاين فسوق الاربعاء "نعيسة"، وتساءل كيف لمدينة انجبت رياضيين وسياسيين ومشاهير تعيش هذه الوضعية وطالب بزيارة ملكية ليها. اللي يمكن فقص المنتخبين خاصة الرئيس منظم المهرجان اسمه جواد غريب هو ان الخياري، حسب ما نقله احد الحضور ل"كود" ختم ب"هاد الشي غريب اللي كيوقع فهاد المدينة".
طبعا الرئيس اعتبر انه مقصود بكل ما قاله الخياري وبان ليه باللي السهرة اللي دارها باش تجيب ليه اصوات تشوه فيها. واتهم الخياري بدعم حزب العدالة والتنمية وهو ما نفاه مؤكدا ان هذا الحزب من خلال وزيره في الاتصال سد عليه باب الرزق في اشارة الى دفاتر تحملات القنوات العمومية
الخياري اكد ل"كود" انه قدم فنا ساخرا ولم يستهدف احدا وانه كان صادقا مع جمهوره. واضاف انه لا رئيس الجماعة ولا غيره مسؤولان مسؤولية مباشرة ولوحدهما على الوضعية الحالية للمدينة "هاد الشي راه ديال سياسة 30 عام كلشي عندو نصيب فالمسؤولية".
الفنان اوضح انه قبل الحضور لمدينة يحبها وضحى حتى بتعويضاته، فتعويضه في حفلات مماثلة 60 الف درهما ولانه يحب هذه المدينة لم يتقاض الا 20 الف درهما واستغرب من سوق اشاعة حصولي على 20 مليون سنتيم.