كيفاش الفقر النضالي لشي بعضين خلاهم يتسغلوا "علال" ضد بنكيران اللي طلع درويش وولد الناس

—
مكنتش كنتخايل أن الفقر النضالي يمكن يوصل لبنادم لدرجة يبقى سامر باش يوظف أي ظاهرة أو أي شخص ضد الحكومة وبنكيران، أي حاجة توقع سواء مزيانة أو عيانة ولاو كيحاولو يستهدفوا بيها الحكومة وينقصوا منها، بنكيران طلع درويش وولد الناس، وهاديك كثرة الهدرة ديالو، هي لي خلات من هب ودب يبدى ينتاقد فيه، وهادشي كنلاحظوه بزاف فالمواقع الإجتماعية والإخبارية لي كتظن أن الجرأة في انتقاد الحكومة غادا تعطيها قيمة نضالية فالسوق، كاين لي وصلات بيه الجرأة لأنه يطالب بنكيران بالرحيل، واسي راه هادي حكومة منتخبة ديمقراطيا فانتخابات نزيهة وشفافة، آشمن ارحل.

الفقر النضالي وصل بالبعض لدرجة ربط تصرفات أبناء اللامباويين بآبائهم، ولاو كيتدخلوا حتى فالحياة الخاصة للأفراد، علما أنهم كيقولوا كيدافعو على الحريات الفردية، ويبقاو حاضيين أي هفوة من قبل اللامباويين باش يحاولو يفضحوهم أمام الجماهير، في توهم كاذب من قبلهم بلي أن الجماهير مسالية راسها، ومتباعهم، الجماهير راه هي لي صوتات على العدالة والتنمية وهي لي غادا تصوت على التراكتور والإستقلال، وهي لي كتخرج فرحانة للشارع ملي كيغلب المونتاخاب، أما لي تخايل أن الألف لي عندو فالفايس راهم جماهير، أو 10 ألاف لي كيدخلو عندو للسيت راهم جماهير فراه غي غارق فالأوهام، الأوهام لي غرقو فيها اليساريين قبل منهم وباقي مطلعوش منها.

علال القادوس هو مواطن بسيط، هادا هو التعريف لي قريتو عند العديد، هاد مواطن بسيط كتقال على واحد فقير ولد حي شعبي وغير مضر ومكيشكلش خطر عليهم، مواطن بسيط هو انسان نية خدوم قنوع معندوش تطلعات، أما غي يجبد شي سيف ويولي يقطع الطريق مكيبقاش مواطن بسيط كيولي مركب، مواطن بوزبالي مشرمل شفار كلوشار حباس، بسيط حيث مكيعضش، وراضي وخاضع، هادا هو تعريف مواطن بسيط، مواطن مغلوب على أمره، الواليدة مواطنة بسيطة حيث نية الله وكتبغي الملك وصوتات على العدالة والتنمية، وكتقول أننا عايشين بيخير فالمغرب.

علال المواطن البسيط، تطوع فحومتو وسرح لقوادس ديالها الله يجازيه بيخير، هادشي كيوقع ديما فأي حي شعبي من طرف العديد ولكن عمرهم تصورو وتلاحو فاليوتوب عليها راه مولاوش أبطال، بحال علال كثار فالأحياء الشعبية حيث تما حاضرلا تكافل اجتماعي قوي، ومع انعدام مساحات خاصة فردية فراه الضيق خلاهم يتشاركو مشاكل بعضياتهم و أفراحهم.

علال مواطن بسيط، الله يكثر من مثالو، ولكن لي ماشي بسيط، هوما لي باغين يوظفو علال فإستهداف بنكيران وحكومتو، لي ماشي بساط ومعقدين ومراض هوما لي باغين يردو من علال وحياة علال وبؤس علال قضية وطنية مسؤولة عليها الدولة، والحكومة.

فحوار داروه مع علال، أبان علال على وعي سياسي كبير، ملي كانتى كتجرو المذيعة باش يعطي تصريح مناهض لبنكيران، أجابها بوعي المواطن البسيط السياسي: واش بغيتي بنكيران يجي يسرحليك القوادس، هاداك السيد قرا ووصل وراه كيجري على ولادو الله يعاونو…. هاد التصريح الخالي من الحقد النضالي، ومن سكيزوفرينيا الممانعة، راه عميق جدا، علال عارف راسو ماقراش ومعندوش شي مؤهلات لي تقدر تعيشو شي عيشة حسن من هاديك، وهو مرتاح ماشكى على حد، باغي يتزوج راه كلنا باغين نتزوجو والغالب الله، هادي ماشي أزمتو هو بوحدو، سولاتو المذيعة آش المطالب ديالو من المسؤولين، ماطلب والو علال حيث عندو نفس حارة لي مخلياه خدام ففرناتشي وماشي النهار وماطال وهو كيغني على الدولة تعطيه وتديرليه وتوفرليه بحال العاهات الإجتماعية الندالية، علال حتى بغا يخرج كلمة يعطيوني وهو يردها من فمو مخرجاتليهش كلها، حيث علال راجل، مولف كيعرق على رزقو، ماشي عالة كيصرفو عليه واليديه وباغي الدولة تعوض واليديه، علال هز راسو باقي برهوش، وباقي هاز راسو، وماباغي تاحاجة من غير تفوتوه عليكم، وافوتو علال راه مواطن بسيط والى جريتوه معاكم غادي تعقدوه ماغاديش يبقى بسيط، غادي يولي بحالكم معقد ومريض.