شنو هاد الحكرة هادي لي غادا و كاتزاد ! اي واحد مختالف علينا كانحكروه ! لي مختالف فاللون محكور ، لي مختالف فالجنس محكور، لي مختالف فالديانة محكور ، شي حاكر شي حيت بوزبال حكار

"عطيو لمو" "سرو هو لي قلب عليها" "يستاهل كون كنت انا كون درت اكتر من داكشي" "كان خاصهم يقتلو مو" … هادو هوما 90 فلميا ديال التعليقات لي كانو على الفيديو ديال مثلي لي تعداو عليه الهايش مايش ففاس ! شبعو فيه رفس و ركيل و ضرب … و قالك داعش لا تمثلنا ! ربي ربي !!؟؟
مايمكنش المغرب ليوم يكون هو مغرب الحداثة و حقوق الانسان و البلد المنفتح على الحضارات و حنا كانشوفو الهيماج مسيطر فحالا البلاد سايبة كولا واحد باغي يدير شرع يديه ها لي باغي يمنع البحر على البنات لي لابسين المايو هالي مخدم البوليس و الصحافة و القاضي على ود صاية ! ها لي قاليه مخو نوض سلخ مثلي فالزنقة و حاول تقتلو ! مال المغاربة ولاو كايخلعو ؟؟
شنو هاد الحكرة هادي لي غادا و كاتزاد ! اي واحد مختالف علينا كانحكروه ! لي مختالف فاللون محكور ، لي مختالف فالجنس محكور، لي مختالف فالديانة محكور ، شي حاكر شي، بنادم كاتعطيه شوية ديال السلطة و لا شوية ديال القوة و كايشد خوه كايعفط عليه فحال سراق الزيت واش حنا بنادم و لا حيوان؟ هاد الهايش مايش المريض لي تحاماو على داك المثلي كايصحاب راسهم حماة الفضيلة و دوك لي تابعينهم بالتعليقات فالمواقع الاجتماعية من انتم ؟ من انتم جند الله في ارضه !? ياك المخير فيكم لاشاف بنت كاتكريسا قدام عينيه يقدر يحني قمقومو و يزيد خلفة مع الطريق مايتدخلش مايحاولش ينقدها ! بنادم حكار كايبين ترجليت ديالو غي على العيالات لي لبسو الصايات و على المثليين و على عوازة و على الاقليات … حكارة ! كايشوهو بالبلاد و بالناس الطييبين لي دازو من هاد الارض لي سميتها المغرب …
هادوك لي بانو فالفيديو انا متأكدة ماكاينش بيناتهم واحد سوي ! واحد بعقلو! واحد ناجح فحياتو ! واحد راضي على راسو !رباعة ديال الحكارة و الفاشلين و المقموعين لي كايتصيدو اصغر فرصة باش بيينو راه عندهم وجود ! كلهم تقلبهم تلقاهم شبعانين عقد و كبت و وسخ و فقر و ضغط !كاين فيهم لي ربما مثلي و ماراضيش يعتارف بيها و كاين بيناتهم الكذاب و الغشاش و المنافق و المشعوذ و كاين بيناتهم المكبوت و المقهور … و لكن كلهم بدون استثناء مرضى نفسيون مطلوقين فسبييطار كبير سميتو المغرب !!
فين عايشين حنايا؟ و اشمن بلاد غانخليو لولادنا ! البلاد لي الرجلة فيها كاتقاس بشحال من عفطة عفطتي على راس داك الز…ل ! الايمان كايتقاس بشحال من تصرفيقة صرفقتيه و شحال من كوشية دخلتي ليه ؟ واش فحال هادو لي بانو فالفيديو و دوك لي تابغينهم بالزغاريت فالكومونطيرات تاهوما مواطنين؟ غايصوتو غدا ؟ و غايقررو اينا قوانين نعيشو بيها ؟واش هاد الهايش مايش هوا لي معولين عليه يقرر مستقبل البلاد! هادا هو الشعب و هادي هي الاغلبية للاسف ! بغا لي بغا و كره لي كره هاد الناس لي بانو فالفيديو هوما الاغلبية ليوم و هوما لي كايعبرو عن الصورة الحقيقية للمغربي و لي قال العكس يطل على التعاليق ففايسبوك ديال كوود ! شوفو و تفرجو فالانفتاح، و الاعتدال، و التسامح، و تقبل الآخر … شوفو مزيان شكون هو جيل 2015 فالمغرب ! شكون هوما الآباء و الامهات لي كايربيو المغاربة لي غايجيو من بعد …
هادشي لي كايوقع مؤخرا فالبلاد ماكايبشرش بالخير، الاخبار لي كانصدرو العالم كلها كاتبين للناس انو المغرب ليوم فيه خلل لي كايقرا علينا غانبانو ليه فحال افغانستان و لا دارفور الناس كايخلقو الحدث بالاختراعات و حنا فين ماكاين شي بسالة و شي حموضة حنا اللولين فيها كاناقشو الترامي و الصايات و الماكلة فرمضان و المثلية! ياع منا ياع ! بسالينا وهادشي طلع فالراس ! الهايش مايش طغا! الدواعش خرجو، فين ما كاين شي مقموع و لا مقموعة بغاو يسيطرو و يفرضو الرأي ديالو صحة على بنادم ! تالين غانبقاو هاكا ؟ راه الدولة خاصها تدخل باش كولا واحد يشد بلاصتو و يتبت حيت بنادم عندنا كاموني ..
الحاصول ! الله يعز الحكام