الرحيل دمعة مسافرة الحلقة التاسعة

—
هاد العام كان تْعيس، اللي عْملتو، ما فلحتش فيه. بغيت نحصل على نقط ممتازة، ولاكن نسيت خصّني نتعب عليها، بغيت نهدي قلبي ألشي شابة اللي تستحقو، ولاكن بناتنا حوتات مطْليات بالصّابون، عرفوا إطوّروا هاد المهارة هادي قرون. عوّل الراجل على عضلاتو القوية، فضّلات المراة تسخّر المخ اللي كايتحكّم فى كلّ عضلة أو شعرة فى الدّات، أو الطموبيلة لاش تْليق إيلا ما عندها موطور، هو اللي كايشطّحها.
بناتنا غادي إخلّيوَك ديما كاتشعر بأنك أنت الوحيد فى حياتهم، ولاكن فى الحقيقة عندهم علاقة مع النصّ فى القسم، كيفاش دايْرة هاد العلاقة؟ الإسلام باقي سادّ الباب في أوجه بعض التجاوزات، ولاكن "البروگرام" كولّو متوفّر: "مارش آ أرْيير"، "هالُمّو" أو "لاگلاص". أو إيلا حطّيتي شي بنت هنا، غير باش تركب تمّا أو تفشّش مرضي الوالدين بجميع نِعم الدنيا أو الآخرة. المهم، طموبيلة كبيرة، من الأحسن "كات كات بجاج فومي". واحد لالا ّتي الكرش، كرش الرفاهية أو اليدّ السخية، بزطام تقيل أو عقل خفيف. بناتنا كايحماقوا على هاد النمودج الطّيب أو النقلة اللي ما ضارْبة حْساب. ما كايبغيوْش اللي كايفكّر بزاف أو ما كايتسرّعش. كايقولوا، أو معاهم الحق، اللي فكّر، سمّم داتو بالشك، أو الشك شحيح، قبيح بحال الرّيح. أو إيلا نَشْفات العوينة، ما كاتحلى لا قصارة لا مْسارية فى البوتيكات. الراجل المزيان أو اللي كايحماقوا عليه الدّريات بلا ستتناء هو اللي ما عندو عقل أو دوّبو فى عروقو التّحتانيين. أو شحال من وحدة خرجات على مصير عشيقها أو اتّعادت بالعاني من طرف حدّ آخور غير باش تنتقم منو، علاش إخونّي؟ أو مع من اتّشاور غير دوّق سيهام، سلمة، شيْما، لينا، غيتة أو بَسمات الفاسي اللي طييّرات ليّا نعاسي؟ باقية ضايْرة الحرب فى هاد البلاد، بين الراجل أو المراة. ماشي غير فى البيرو، الزنقة، ولا ّ فى الدار، حتى فى الفراش.