قولو لينا باغيين تخوصصو التعليم العمومي وبلا قوالب

قالك أسيدي الدولة كتفكر تحرم الأسرة المغربية الميسورة من مجانية التعليم العمومي وغادي يولو كيخلصو لفلوس باش يقريو ولادهم فمؤسسات الدولة. واش أعباد الله مزال شي أسرة فالمغرب شبعانة فلوس كتسيفط ولادها يقراو في المدرسة العمومية.
هاد الناس راه باغيين يسطيونا. باغيين بخوصصو التعليم ولكن بالقوالب وأولى القوالب لي باغيين يجهزو بها على مجانية التعليم العمومي هي أن هناك أسر مغربية خانزة فلوس ممحقهاش تستفد من مجانية التعليم، وهذا غير صحيح بتاتا.
راه غير الأسر لي مقودة عليها هي لي مزال كتقري ولادها فالعمومي أما الأسر لي عندها المادة كتصرف على ولادها الزبابل ديال الفلوس باش يقراو فأحسن المدارس الخاصة سواء داخل أو خارج المغرب.
والمقصود بالأسر لي مفحالهش هي الأسر لي معندهاش دخل شهري قار أو بمعنى آخر معندها حتى واحد خدام مع المخزن، وراه حتا هدوك لي عندهوم دخل شهري قار أو موظفين بسطاء ولادهوم مكيقراش فالمدرسة العمومية، مع استثناءات قليلة طبعا، لأسباب كثيرة طبعا، وأهمها أن المدرسة العمومية لم تعد تقوم بأدوارها الحقيقية على أكمل وجه فيما يتعلق بالتربية والتعليم والخطير أن مؤسسات التعليم العمومي باتت مرتبطة في ذهنية المواطن المغربي بالكسل والشغب والمخدرات والإغتصاب.
راحنا كلنا ولاد المدرسة العمومية لكن شتان بين الأمس واليوم، حيث أن السائد كان هو أن التلاميذ "المكلخين" وحدهم لي كانو كيمشيو يقراو فالبريفي بعد فشلهم في مسايرة إيقاع التعلم المرتفع في التعليم العمومي، أما اليوم ذكاء التلميذ وحده غير كاف للتفوق الدراسي في المدرسة العمومية والدليل على ذلك أن هناك أسر مغربية فقيرة كتنهج سياسية التقشف باش توفر شوية ديال لفلوس لدفع تعويضات الساعات الإضافية لأبنائها . إيوا من هاد شي كلو قولونا باغيين تخوصصو التعليم العمومي وبلا قوالب.