لي تلف يشد الارض ! راه لافاك بلاصة القراية و العلم … ماشي بلاصة المطايفة و الحباسات!

—
شي حوايج وليت كنقراهم مؤخرا كيصدموني ! فحال واحد الصورة نتاشرات ففايسبوك ديال شي طلبة "الشيوعيين ماويين" مشدودين فالحبس و صحابهم كايطالبو الدولة تطلقهم ! آش وصل طلبة للحبس ؟ ياك مشيتو تقراو كي درتو لقيتو راسكم كاتسبيريو تانتوما ؟ حتا انا قريت و لكن ماعمري فكرت ندير اضراب من غير دوك الاضرابات ديال الانتفاضة الفلسطينية فالكوليج و الليسي لي كانو كايجيونا من الجنة و الناس حيت كنخرجو ساعة و لا ساعتين نتسركلو فالزنقة و نجمعو حدا باب الليسي ! كنبداو نغوتو "دم عربي واااحييد ! قدس عربي واااحيييد" غير كيحلو لينا الباب النص كايمشي للمحلبة يعاود الفطور و النص لاخور كايمشي يدور فالمدينة و كنحمدو الله و نشكروه على نعمة فلسطين و على الحرب لي شابكة و ماكرهناهاش تشبك كل نهار باش نبقاو حنا دايرين الاضراب تضامنا مع خوتنا تما… شوف عقل الصغر كي داير !


و لكن مورا الباك القضية تبدلات و بنادم طلع معاه القالب و كلشي ولا كايفكر خاصو يقراو يسالي و يخدم و يتنفس تا هو شي شوية ،يحرك الفلوس و يعيش حياتو حيت كلا واحد فهم بيلا خاصو يتضامن مع مخو لابغا يطفرو ! الا هاد الاخوان لي مافهمتش كيفاش كايفكرو ..ياك الدولة عطاتك بلاصة فلافاك ؟ و جابت ليك استاد يقريك و دارت ليك مكتبة فيها الكتوبة فابور ! ياك عندك شومبر فالحي الجامعي ؟ اييه مع 4 د الباشار و لكن داكشي لي عطا الله راك حتا نتا كن جبتي شي معدل خطير فالباك و لا كن برهنتي على شي نظرية علمية واعرة كون جات ميريكان عطاتك لابورس و داتك ل هارفارد فين كاين شومبر ديالك بوحدك هاد القضية راه كديرها مع شحال من افريقي كيسيفطوليه يمشي عندهم من ادغال الكاميرون و لا شي فيليبيني من غابات بانايو يقدرو يديروها معاك تانتا لا كنتي واعر! ياك كاتمشي تاكل فالمطعم د الكلية وجبة ب 2 دراهم ؟ ايوا شبغيتي تكدد ؟ راه 2 دراهم ماهي تا ثمن خبزة فيها درهم د الزبدة! ياك كاين الطوبيس باش تحرك و ياك كاينة المنحة ؟ اييه قليلة و لكن راه ماشي الدولة لي ولداتك النهار اللول راه المنحة فجميع الدول كتعطا كمساعدة ! يعني تعاون بيها مع دوك الفلوس لي خاص يعطوك واليديك ! اه خاص يعطوك حيت نتا طالب و حيت هوما ولدوك و بغاوك تقرا … ماعندهومش؟ و را تا الدولة فقيرة و جهدها دايراه معاك! هادشي لي عطا الله ! ايوا شبغيتي ؟

اشداك نتا لشي اشتراكية و شي ماوية و لا شي لينينية ؟ هاد المفاهيم راه فاتت و ماتت خلاها السيكتور! ليوم كاينة حاجة وحدة "الشركة تحكم العالم" ! الفلوس هوما المبادئ و هوما القيم ! و شحال عندك شحال كتسوا ! راه ميريكان مامشاتش للحرب فالعراق من اجل نشر الديموقراطية و فرانسا مامشاتش حاربات فمالي من حيت بقاو فيها الكوحل و دوك الشيخات لي تناتفو فالبيكوب راه تناتفو على ود عومار ، الفلوس، المصالح الاقتصادية، الرأس مال، الاستثمارات …


هادشي علاش داير العالم ليوما و هادشي لي خاصك تشوفو فحياتك ! واش مخلي تقرا فحال خوتك و تاكل الخبز و تجيب شي ليصونص و لا شي ماستر و تمشي دوز تانتا الكونكور د التعليم و لا البوليس و لا المخازنية و غادي ضيع وقتك و شبابك فالحباسات ؟ راه هادي هي العبثية كتمشى على رجليها! راه ماو تسي تونك بمخو كون فاق من القبر كون بدا بيك نتا اللول صيفطك لشي وزين ديال الحوت فاسفي تقطع القزازب ديال كابايلة ، تخدم تمنطاش لساعة فالنهار و تخلص 10 دراهم فالاسبوع !و مايخليكش ناشر رجليك فلافاك ما تقرا ما تخلي الناس يقراو! هادشي مابغاتوش ليك الدولة و عطاتك تانتا فرصة تقرا و تخدم و تلبس الكوستيم و تزوج … و تقدر دير معاك مزيان لا كنتي قافز و ولد الوقت و تعطيك شي مكتب فشي مقاطعة و لا شي بلدية تنشر فيه رجليك و تولي تانتا موظف عندك دار فالسكن الاقتصادي و شي داسيا مازوط و مالك آش بغيتي ؟


بنادم يكون واقعي شي شوية و برغماتي راه الهضرة ماتشري خضرة و لابغيتي طفرو راه كاينة الف وسيلة و لا مابغيتيش طفرو راه كاينة وسيلة وحدة هي تبقا تابع ماو و لينين و ماركس ! و غير فاطار المستملحات راه الرفاق فكوبا كايقلبو يتقربو من ميريكان هاد ليامات و ما بقا والو و يطبعو معاهم العلاقات.