الطالب الجامعي لي عايش فشومبر مع ثلاتة د الطلبة وسط الزحام و ريحة الحزاق و هادشي ماكايحفزوش باش يمشي يقرا على راسو ! مخلي قرايتو و مقابل الفصائل الطلابية راه فاشل كايخبي الفشل ديالو بدوك للانتمائات الخاوية!

كيفاش كايفكرو هادوك لي كايمشيو يتقاتلو فالجامعات؟ مافهمتش أنا العقلية ديال هاد بنادم و لي كاتلقا الأغلبية فيهم ولاد الدواور و ولاد البادية دارهم تقاتلو معاه باش يسفطوه يقرا فالمدينة ! كاتلقا مو ماعندها تا الكرصون حيت فلوسو عطاتهم ليه باش يشد المركوب للرباط و لا مراكش و لا اكادير و كايمشي هو ينخارط فشي فصيل و يبداو عاطينها للمضاربات و السيوفة ! يا ودي يا الطالب المغربي يا ودي ! يا ودي يا الجامعة يا ودي …
ماشي مشكل الانسان يكون عندو انتماء سياسي و لا حزبي ! ماشي مشكل يكون كايدافع على فكرة ! تسمي راسك امازيغي و لا صحراوي و لا يساري و لا عدلاوي! و هي اسماء سميتم بها أنفسكم ما أنزل الله بها من سلطان ! و لكن بنادم ماينساش راسو راه طالب قبل كل شيء ! جاي للجامعة باش يقرا و ياخد ديبلوم و يمشي يخدم على راسو و يساهم شوية فإنتاج شي حاجة من غير الخرا لي عمر بيه الواد الحار ديال الحي الجامعي ! راه سميتها الجامعة ! الكلية ! داروها الناس باش يقراو فيها ماشي باش يضاربو فيها و يتقاتلو بالسيوفة مع بعضياتهم و مع المخزن …
مافهمتش أنا العقلية ديال واحد قالك كايناضل من داخل الجامعة من أجل التغيير و الحقوق و الشعب و دوك الشعارات الكبار و هو ماقدرش يناضل حتى على راسو و يفاليدي les modules ديالو كاملين ! انسان جامعي كايقرا و عندو وقت فراغ فعوض مايمشي يقرا ليه شي لغة لي تنفعو ! و أغلب هادوك لي منخارطين بعدا فدوك الفصائل كاتلقاه عندو غي العربية فحالا عايش مع قريش و تا العربية ديال قريش بزاف عليه حيت لا كتب ليك بيها غاتلقاها عامرة اخطاء ! عوض مايستاغل ديك ثلت سنين و لا ربع سنين فالجامعة فالقراية و يحسن مستواه فاللغات لي مطلوبين فسوق الشغل و فالبحث العلمي ، اللغات لي لاتعلمهم الواحد يقدر ينفاتح شوية على العالم الخارجي و يخرج من ديك القوقعة ديال الفصائل الطلابية لي أكل عليها الدهر و شرب!
راه شوية ديال البرغماتية مطلوبة فالحياة و أنا بالنسبة ليا الطالب لي ناعس مع ثلاتة ديال الطلبة فشومبر فالحي الجامعي و غي داك الزحام و ريحة الحزاق ماكايشكلوش ليه واحد المحفز كبير كل صباح باش يحوفر و يقرا على راسو و يحاول ينجح و يهرب من داك الجحيم راه مايستاحقش يكون فالجامعة ! الطالب لي عايش مكحفر بالمنحة و اللوبيا و العدس و كايشوف راسو مقودة عليه و دارهم مقودة عليهم اكثر منو و مازاااال عندو دوك الاحلام الطفولية ديال الفصيل و الايديولوجية و الثورة و النضال و كايتخايل راسو هو سبارطاكيس محرر العبيد هو ماحرر تا راسو من القهرة لي عايش فيها راه فاشل فاشل فاشل !
الاحتماء بالفصائل و العشائر و النضالات المزعومة هي وسيلة كايخبيو بيها بزاف ديال الطلبة الفشل ديالهم كطلبة ماكايعرفوش يتعاملو مع الحياة! ثم علاش هاد المشكل ديال الفصائل و العشائر كاين غي فلافاك علاش كبريات المعاهد و مدارس التجارة و المهندسين مافيهمش هاد البسالة و بنادم مامساليش فيهم لهادشي و بلا ماينقز شي بوعار يقول راه دوك المدارس مافيهمش ولاد الشعب ! دوك المدارس عامرين غا بولاد الشعب و لكن ماشي ولاد الشعب البكاية … ولاد الشعب لي مطراسيين مخطط لراسهم و حياتهم و غادين فيه بعيدا عن عشوائية الجامعات !
الشعب مامحتاجش لفصائل تاضارب بالسيوفة باش دافع عليه و لا تجيب ليه حقو ! الشعب قالكم غي تكافاو مع راسكم و قراو و فاليديو و نقصو شوية من دوك الاخطاء الإملائية فاش تكتبو بالعربية الفصحى و تعلمو تهضرو بالفرونسي و لونكلي باش تشوفو شنو طاري فالعالم و تحلو عينيكم … كونو طلبة علم و كفى ! لا قديتو غي على هاد القضية راه برافو عليكم !