واش هاد السبيطارات عندنا خاصهم سبيطار ؟ باش نتفاهمو , أنا كنهضر على سبيطارات ديال المخزن ماشي على السبيطارات ديال الفلوس , وخا تا هي فيها وفيها . شحال من واحد دخل ليا مريض عا شوية , وخرج مهلوك مسالي بالفقسة . هو ف الحقيقة كاينين شي أطباء ولاد الناس , ولكن الأكثرية راكم عارفين . 20 درهم باش دخل من الباب , وما حدك نتا داخل والطريفة كتزاد . أنا باغي عا نعرف من سيادة الوزيرة كيفاش شي واحد مريض وباش يدير التحاليل يعرف آش عندو , خاصو شهرين عا باش يشد الرونديفو . ولا شي واحد مريض بالقلب وكيعطيوه رونديفو ديال 6 اشهر باش يشوفو منين المشكل . هو الا عاش عا هاد 6 اشهر , را ما يقولها لحد . بحالي عزرايل فاش غادي يجي ويشوف الرونديفو غادي يرجع ف حالو ..أما كاينين شي فراملية عندنا وأطباء وخا تموت قدامهم مايعتقوكش وخا عا بشربة د الما . السيد راه فيه الموت جاي من كسيدة ولا طايح من عمارة , مايحطوش فيه يديهم حتى يخلص ... واش هادو بعقولهم ولا لا ؟ كون كانت شوية ديال الإنسانية والإحترام , كان عليهم يدخلوه يدير عملية ولا يديرو ليه السكانير ومنين يفيق ولا يولي بصحتو يخلص , وخا يديرو معاه الكريدي , ياك عا السبيطار ديال المخزن . واش حنا مواطنين ولا دبان ؟ وحتى دبان ولا عندو حقوق في بعض الدول . كتعجبني الوزيرة ديال الصحة أنها ديما كتفرنس وضاربة الدنيا بضحكة . زاعما بغات تكول لينا راها صحيحة ؟ كيقول المثل المغربي : جوج بلايص ماخصكش تشوفهم , السبيطار والبوليس . والمثل ماكيجيش هكذا . واش هاد لالا بادو ماسامعاش بكيفاش كيتوزع الدوا في السبيطارات ؟ واش ماعمرهاما ضربات ليها في مخها وقالت ندير شي دورة على غفلة ف شي دوار , نشوف كيف دايرة الأمور ؟ ماعمرها ما قرقبات الناب في الحمام مع الكسالة ؟ما عمرها ما وقفات قدام شي باب ديال سبيطار ؟ ماعمرها ما مشات تزور خالتها وبقات كتسنا نوبتها من الصباح تا العشية وقالوا ليها في الاخر رجعي غدا ؟ بصراحة , هي لي جات معاها الضحكة . لقيتي على من ضحكي ضحكي أعمتي . في المغرب , ماعندكش الحق تمرض الى كنتي مزلوط وماتكسابش الفلوس ديال التدويرة وديال الدوا . البلاد لي باقيين كايموتو فيها الناس ببوحمرون والعقارب في هاد الزمان ماشي بلاد . أما واحد لابيلانص خالينا ساكتين وصافي . ماتحرك تاتخلص ليها ليصانص , هادي في حالة لاماكنتش خاسرة . الإقتصاد ديال الدولة في ليسانس كيجي عا فوق راس المزاليط , اما ديك المرسيديسات والسيارات ديال الناس ليبحال السيدة الوزيرة ولي كيظلو راكبين عليها عائلاتهم , مابانتش للدولة تقتصد فيها . حنا ما بغيناش من الدولة تشري للمرضى البنان والتفاح , حنا باغيين ع يلقى المواطن الى مرض سبيطار مايقولش ليه رجع بعد شهر باش نشوفو باش مريض , مايقولش ليه را سكانير خاسر , مايقولش ليه دور مع الطبيب ب 2000 درهم الا بغيتي دير العملية دابا . بغينا سبيطار يداوي الناس ماشي يزيدهم مرض على مرض . هادشي كنقولو فيه وحنا عارفين أنو على من تقرا زبورك أداوود . حنا المزاليط كنشوفو في جهة , وصحاب الكروش وصحابات البارفانات ديال 1000 درهم . كيشوفو في جهة اخرى . بالنسبة ليهم مات واحد زايد ناقص , ماتوا تا 100 عا خادي يخففو عليهم , بصراحة هما ما لقاوش كيفاش يديرو لينا باش يمحيونا مرة وحدة ويبقاو عا بوحدهم . عندك الحق أ عمتي بادو منين كضحكي . ضحكي علينا كيف ما بغيتي , ما عندك دراري باش تجلبي ليهم وخاصك نهار باش توصلي لسبيطار , ما عندك الجلالة في عينيك وكتسناي 3 سنين باش تحيديها – هو عندك في الحقيقة جلالة من نوع آخر - , عندك الحق أعمتي بادو , ضحكي علينا وزيدي ضحكي . أما حنا فهجرناه معاكم شحال هادي [email protected] mailto:[email protected]
