هاد المدعو سفيان بحري راه كيسيء الى الملك: واش فعز فضيحة "باناما بيبرز" عاود نشر صور للقصور الملكية: اولا قديمة وثانيا ماشي وقتها وثالثا هاد الشي اسمو الاستفزاز

اليوم نشرات "لوموند" مقال حول "360" فيه انتقادات كثيرة، ماشي للجريدة لان حتى واحد ما ماديها فيها ولكن للي وراها اي الدولة وكتبو ديما "المقربة للقصر".
هاد الشي فيه اساءة للقصر للملك. شعبيتو كتجعلو ما محتاج لا لاصحاب الماجيدي ولا لاصحاب الهمة ولا لغيرهم.
عزيز على لمغاربة وكيبغيو ملكهم بلا هاد المستشارين اللي ترفعات شعارات برحيلهم فمسيرات عشرين فبراير ومن بعد تزادت معزة الملك عند شعبو. دابا وبالتزامن مع هاد "اوراق بنما" والفضائح المالية اللي هزات العالم كلو نوض يا سيدي سفيان بحري اللي غير صورة ونشر فيديو على القصور الملكية. اولا هاد الصور قدام وماشي ديالو وحشومة تكون فيه اسمو وثانيا وهادا هو الخطير هادا ماشي توقيت لنشرها.
ماشي توقيت لنشر صور قصور ويالله تسريبات تحدثات عن اقتناء الماجيدي لاقامة كبيرة بباريس وزورق يدعى البوغاز جميل جدا عبر شركة كانت تتخذ من الجزر العذراء البريطانية /جنة ضريبية داروها باش يتهربو من الضرائب/ وهاد الشركة كيسيرها الماجيدي. نعاودوها يمكن قانونيا يكون عندو وثائق تسمح له باخراج 40 مليار ثمن هاد الجوج، من مكتب الصرف ولكن القضية ماشي تهريب من ضرائب او مخالفة قوانين البلد ولكن القضية علاش تشري هاد الشي بهاد الطريقة اي اخلاقية سياسية اكثر.
وفهاد الجو المشحون فالفايس ووسائل التواصل الاجتماعي نوضو عطيو لهاد سفيان يخرج فيديوات القصر. هاد الشي عندو اسم واحد هو الاستفزاز المجاني الخاوي