علي عمار ناشر "لوديسك" مفجر فضيحة الماجيدي قبل "باناما بيبرز": ها كيفاش اكتفشنا الفضيحة وهي اخلاقية وها علاش

في حواره مع "كود" يكشف ناشر الجريدة الرقمية المؤدى عنها "لوديسك" تفاصيل كان سباقا لنشرها بخصوص تورط محمد منير الماجيدي مدير الكتابة الخاصة للملك في فضيحة "باناما بيبرز" التي نشرتها صحف عالمية ليلة امس. تابعوا تفاصيل ذلك
"كود": كنتو سباقين لنشر معطيات سبقتم فيها ما نشر عن "باناما بيبرز" وتم انتقادكم والرد عليكم. باش كتحسو دابا؟
احساسنا درنا خدمتنا وشاركنا فعملية عالمية. حنا واخا ما داخلينش لحد الان فهاد التجمع ديال صحافيي التحقيق يالله غادي يدخلونا، اشتغلنا فهاد الموضوع. كاينة صحافة سباتنا وانتاقداتنا واليوم بان باللي تحقيقنا سبق وكشف امور مازال لحد الان ما وصلوهاش حتى هما.
"كود": كتكلم على شركة اس ام سي دي ياك؟
طبعا هاد الشركة اللي كانت مساهمة ف"اليانس" ديال الازرق. كيفاش بدينا التحقيق؟ ناضت "360" نشرات اسئلة وجهها صحافي امريكي للماجيدي. الصحافي كان كيوجد تحقيق حول "الجنان الضريبية". فالمادة دارو اسم "اس ام سي دي". بدينا التحقيق ديالنا واكتشفنا ان هاد الشركة كانت مساهمة في "اليانس" بمعنى ان الملك محمد السادس كان مساهم فهاد الشركة الخاصة بالعقار.
"كود": درتو تحقيق اخر على هاد القضية لان البعض نفى ان تكون "اس ام سي دي" مساهمة فاليانس؟
هادا موضوع اخر، باش مشينا لدركي البورصة اي الشركة المنظمة للبورصة فالمغرب مازال لحد الان هاد الشركة ضمن المساهمين ف"البانس"، ولكن باش اتصلنا بالجزر العذراء البريطانية اللي فيها هاد الشركة توصلنا بجواب ان الشركة تمت ما بقاتش مساهمة ف2012 تصفيتها 2013. حنا اكتشفنا تعامل الماجيدي مع "فونسيكا" البانامية. رغم كل ما قمنا به جاو قطرو علينا الشمع ف"ليكونومسيت" اللي من المساهمين ديالها الشركة الوطنية للاستثمار /الهولدينك الملكي/
في الوثائق المسربة "باناما بيبرز" هاد الشركة شرات باطو وعقار بباريس عبر شركة فاللوكسمبورك. ديالمن هادو؟
واخا ما كاينش اسم الملك محمد السادس راه كان ما يؤكد ذلك ف360 على لسان المحامي هشام الناصري. الباطو اسمو البوغاز ومعروف ديال الملك.
"كود": دابا واش هاد الشي كيعاقب عليه القانون المغربي؟
المشكل الكبير ان هاد الشي ماشي نقاش على مدى قانونية ما قامت به "اس ام سي دي". كل بلاد وقانونها. ممكن تكون هاد الشركة خدات الاذن من مكتب الصرف وغادي يكون كلشي قانوني وما يدخلش فالتهرب الضريبي. المشكل الكبير اخلاقي يتعلق بالشفافية. علاش خاصك دوز من جنة ضريبية باش تستثمر ومناش باغي تخبى وعلاش ما باغيش اسمك يبان. يمكن ليكم تصورو النتائج كون وقع هاد الشي فاوربا.
نقطة اخرى علاش اس ام سي دي استعملت باش تشري اسهم من "البانس" قبل ما تطرح فالبورصة؟ هادا حتى هو ماشي ضد القانون ولكن باش تشري ب28 بالمائة اقل من قيمة الثمن امتياز دارتو الدولة باش تشجع الاستثمار الاجنبي وعليه تتحرك البورصة

اطلعو على اخر تحقيق في الموضوع