عاجل. ها كيفاش البوليس فك لغز اختفاء الزوج المغربي اليهودي طوليدانو =الصورة= فظرف قياسي. ها اش دار الحموشي للموضوع وها المفاجأة الكبيرة اللي توصل ليها التحقيق وها السيد اللي قطعهم ولاحهم فعين الشق

علمت "كود" ان الشرطة اعتقلت قبل قليل المتهم الرئيسي في جريمة غريبة شهدتها الدار البيضاء. يتعلق الامر بجريمة قتل تعرض لها كل من سام طوليدانو وزوجته فكتوريا شتريت وهما مغربيان يهوديا الديانة. الحكاية بدآت يوم العيد. ابناء سام وفكتوريا اتصلا ليطمئنا على والديهما. حتى واحد ما رد عليهم. اتصلوا بالاقرباء والعائلة المقيمة بالدار البيضاء. جاو للدار وما كاينش جواب. العائلة والاصدقاء بلغوا عليهم عند البوليس ليلة الاربعاء. بغاو يعرفو اش وقع.
البوليس ديك الليلة دخل للدار رفقة اقاربهم وبان ليهم من الدقة الاولى ان سام طوليدانو وزوجته فكتوريا شتريت تعرضا لمكروه٬ وفق مصدر "كود". هاد الشي غادي يتأكد ليهم اكثر وبدات الشكوك حول الجاردينيي =البستاني=. البوليس خدم مزيان فهاد القضية واكثر من مزيان حسب مصدر "كود" واكثر من ذلك اوضح مصدر "كود" ان عبد اللطيف الحموشي المدير العام للمديرية العامة للامن الوطني اللي كان فمهمة فالخارج ودخل البارح وضع جميع الامكانيات باش يعرفو اش وقع لهاد العائلة.
على هاد الشي بداو يجمعو الادلة على البستاني. اكتشفوا تقول مصادر "كود" انه عندو ضائقة مالية بل عائلته مهددة ويوم ثاني العيد غادين يلوحو حوايجو فالزنقة حقاش ما خلصش لكرا، غير ان هاد السيد اللي كانت عندو ازمة مالية استاطع بقدرة قادر يلقى دار جديدة ويخلص السمسار وشهرين لكرا. كما تم اكتشاف اثار دم تقول مصادر "كود".
واجههوه وضربها بنكرة في البداية ولكن اقل من ساعة من الان اعترف بكل شيء، السيد قتلهم وقطعهم ولاح جثتهم. فقد وجدت بقايا جثة فكتوريا وزوجها صام قرب مارجان ولمصلى ديال افريقيا بعين الشق بالبيضاء ظهر هذا اليوم.
تفاصيل اخرى عن هذه الجريمة غادية تبان فما تبقى من التحقيق