سجون المملكة وصمة عار لبها: كنظن وأخيرا جات فرصة حقيقية للمندوبية السامية لإدارة السجون باش أنها تستعيد السيطرة على سجون المملكة وتردها حقا أماكن لإعادة التأهيل وماشي مفرخة للمجرمين ومدرسة لهم

كنظن وأخيرا جات فرصة حقيقية للمندوبية السامية لإدارة السجون باش أنها تستعيد السيطرة على سجون المملكة، وتردها حقا أماكن لإعادة التأهيل وماشي مفرخة للمجرمين ومدرسة لهم ، أحداث يوم كانت كافية باش يظهرلينا أننا أمام مشكل أعمق من أنه يتحل عبر خوصصة التموين الغذائي للسجن ، أو بعض التغييرات هنا وهناك ، لأن هاته الفوضى والتي ستتضح معالمها بعد أيام ، باينة أنها نتيجة التسيب الأمني لي كيعرفوا السجن ، وعدم الإنظباط من طرف السجناء ويا حسرة هادو غير قاصرين ، يعني بلا منسمعوا ديك ثم تخطيط لها من قبل مجرمين كبار أو أباطرة المخدرات ، حيث هادو نهار كيبغيو يهربوا كيخرجوا من الباب وكيصبحوا فإسبانيا .
السجون ديال المملكة وصمة عار ليها ، وكتعطى بيهم المثل فالأفلام الأجنبية حول السجون ، لدرجة أنه كاين فيلم بلجيكي سميتو الجحيم كيعاود على سجن طنجة ، هادشي كلو معروف ، ومعروف بلي أن السجن هو استثمار كبير للعديد من تجار المخدرات والإداريين الفاسدين وعلى مستوى عالي ، وهادشي لي بدا كيحاربوا التامك ، ولكن للأسف بقايا النظام لقديم باقيين متجدرين فالمؤسسات السجنية وقويين ولا يضيعون فرصة باش يرجعوا الأمور لما كانت عليها ، والنتيجة هي كيولي الحبس عبارة عن فندق خمس نجوم للبعض أو سوق تجارية مهمة للبعض الآخر ومكان فين يقدر يراكم ثروة عبر التجارة فالممنوعات داخله ، بالإظافة الى غياب أي أنشطة ثقافية أو ترفيهية أو تعليمية ، والتكوين ديال الحبس غي اشاعة وحتى هو بالواسطة والرشوة وقليل المؤسسات لي فيهم بصح تكوين مفيد ولكن كاينين ، لذا هاحنا ولينا كنعيشوا نوع من التسيب الأمني لأنه مكاينش الرادع والعقاب أو التأهيل لي يقدر يصالح المجرم مع المجتمع ، كل ماكاين هو مؤسسات فيها الحكرة والقمع والفساد وكتخرج أقود مافيك من عنف وهمج وانعدام الضمير والأخلاق باش تخليق قادر تحافظ على راسك وسطها ، وكتزاد اجرام مضاعف على كيفاش دخلتي وهادشي لي كيخلي السجين مكتبقاش عندو شي حاجة صعيبة أنه يعاود يرجع ، بل كيولي عندو واحد النوع من الإستخفاف لأنه كعتابر راسو ناجي ، والى دخل فالمونتيف التاني فهذا عندو قيمة اظافية كثر .
هاعلاش هادي فرصة مزيانة وبزاف للمندوبية باش تخلص السجون المغربية من فيروس الفساد لي كينهشها ، ولي كيخليها غير ذات معندى أو نتيجة ، لذا كنتمنى من المندوبية ماتضيعش هاد الفرصة على المغاربة كاملين باش تصلح حقا النظام السجني فالمغرب ، ويولي حقا مكان كيتجنيوا المجرمين الدخول اليه ، وكيتجنبوا المجرمين السابقين العودة اليه.