سيدة كتبحر ففرنسا وجا عندها البوليس. لمغاربة ديوها فشغلكم ودافعو على حقوقكم فبلادكم اما السيدة ومسلمي فرنسا راهم اكثر حرية منكم حقاش عندهم قضاء نزيه وديموقراطية

دابا نايضة هاد الصباح على صورة ديال مرا لابسة البوركيني فشاطئ بفرنسا وجاو عندها 4 ديا البوليس حقاش خرجات قرارات ديال بعض عمدات فرنسا خاصة في لاكوت دازور تمنع هاد النوع من اللباس فوق شواطئها. المرأة نزعت ما فوق راسها وبقيت بلباس اسود ما هو بوركيني ما هو لباس سباحة.
المشكلة ماشي فهاد التفاصيل ولكن فالمغاربة اللي صبحو كلهم كيعلقو عليها. غالبية تدين فرنسا وتسبها وتتحدث عن هتلر والديموقراطية. كاينين محافظين تحدثو عن مشاهد الذل والاهانة والحكرة. طبعا هاد الاسلاميين ضد المايو فالبحر فالمغرب وكيحلمو شي نهار يمنعوه من فرنسا.
بغض النظر على واش هاد المرا عندها الحق ولا اللا. راها فرنسا هاديك. دولة عندها قانون. اللي كيضرر كيمشي للقضاء. راه فرنسا اللي وقعات فيها تفجيرات قتلات ناس كثار ما شدوش 3 الاف ولا 5 الاف شخص يالله عندهم متابعين قلال بزاف.
واش هادو اللي كيهدرو وكينتاقدو يديوها فبلادهم اللي فيها خرق للقانون بشكل دائم وفيها انتقال ديموقراطي قرب يشيح ويقدر يموت كاع وما يوقع والو وفيها تراجع فالحريات بشكل كبير فالسنوات الاخيرة ماشي غير ديال الدولة ديال الفكر الاصولي الاقصائي وفكر ظاهره حداثي اختار التحالف مع المخزن لاعاقة الديموقراطية كذلك.
دابا هاد المرا راها ما كنسناش منك اخي المغربي التضامن ديالك. حقاش عندها طرق تمنحها لها الدولة الفرنسية اللي كتسبوها باش تقاضي البوليسي وتقاضي العمدة وتقاضي حتى الدولة الفرنسية. ولا كانت على حق راها رابحة. حقاش عندهم قضاء نزيه
وديوها فراسكم وخدمو بلادكم راه هنا محتاجين النضال اكثر من لهيه